មន្ត្រីអាហ្វហ្គានីស្ថានដំបូងគេដែលបានចូលរួមកិច្ចពិភាក្សាស្តីពីអាកាសធាតុរបស់អង្គការសហប្រជាជាតិ ចាប់តាំងពីក្រុមតាលីបង់ ឡើងកាន់អំណាច បានប្រាប់សារព័ត៌មាន AFP កាលពីថ្ងៃចន្ទថា ប្រទេសរបស់លោកសង្ឃឹមថា នឹងទទួលបានអត្ថប្រយោជន៍ពីកិច្ចព្រមព្រៀងហិរញ្ញវត្ថុសកល ដែលកំពុងចរចានៅកម្មវិធីស្តីពីអាកាសធាតុ COP29 នៅទីក្រុងបាគូ។

ដោយដឹកនាំក្រុមមួយដែលមានមនុស្សបីនាក់ អតីតអ្នកចរចាតាលីបង់លោក Matiul Haq Khalis បានឈរនៅសាលសន្និសីទ ក្នុងរដ្ឋធានីរបស់ប្រទេសអាស៊ែរបៃហ្សង់ ជាកន្លែងដែលគណៈប្រតិភូមកពីប្រទេសជិត ២០០ បានចាប់ផ្តើមកិច្ចពិភាក្សារយៈពេលពីរសប្តាហ៍។

រដ្ឋាភិបាលដឹកនាំដោយតាលីបង់ ដែលមិនត្រូវបានទទួលស្គាល់ជាអន្តរជាតិ បានព្យាយាម និងបរាជ័យក្នុងការចូលរួមកិច្ចប្រជុំ COP (Conference of Parties) ពីមុន ដែលបានធ្វើឡើង នៅប្រទេសអេហ្ស៊ីប និងអារ៉ាប់រួម។

លោក Khalis អគ្គនាយកទីភ្នាក់ងារការពារបរិស្ថានជាតិអាហ្វហ្គានីស្ថាន (NEPA) បាននិយាយថា ក្រុមរបស់លោក ត្រូវបានអញ្ជើញឲ្យចូលរួមកិច្ចពិភាក្សាដោយរដ្ឋមន្ត្រីបរិស្ថានរបស់ប្រទេសអាស៊ែរបៃហ្សង់ និងប្រធានកម្មវិធី COP29 លោក Mukhtar Babayev។