អតីតប្រធានាធិបតីរុស្ស៊ី លោក ឌីមីទ្រី មេដវេដេវ (Dmitry Medvedev) បានចោទប្រកាន់ក្រុមមេដឹកនាំអឺរ៉ុបកាលពីថ្ងៃអង្គារសប្ដាហ៍នេះថា កំពុងស្វែងរកការដុតបញ្ឆេះឱ្យជម្លោះអ៊ុយក្រែនរីកកាន់តែធ្ងន់ធ្ងរ បន្ទាប់ពីការជាប់ឆ្នោតឡើងវិញរបស់អតីតប្រធានាធិបតីអាមេរិក លោក Donald Trump។

លោក Medvedev មន្ត្រីសន្តិសុខជាន់ខ្ពស់របស់រុស្ស៊ីរូបនេះ បានសរសេរនៅលើបណ្ដាញ Telegram ថា ក្រុមអ្នកនយោបាយអឺរ៉ុបមានគោលបំណង រុញជម្លោះជាមួយរុស្ស៊ីឱ្យចូលទៅក្នុងដំណាក់កាលដែលមិនអាចត្រឡប់វិញបានទាំងដែលពួកគេអាចស្រោចស្រង់បាន ព្រមទាំងបានព្រមានប្រឆាំងការបើកដៃឱ្យទីក្រុង Kyiv ប្រើប្រាស់មីស៊ីលរយៈចម្ងាយឆ្ងាយរបស់លោកខាងលិច បាញ់ទៅកាន់គោលដៅនានានៅក្នុងប្រទេសរុស្ស៊ី ទៀតផង។ 

លោក Medvedev បានច្រានចោលនូវអ្វីដែលលោកហៅថា "ឱសានវាទ" ដាក់ចេញដោយ មេដឹកនាំបក្សប្រឆាំងអាល្លឺម៉ង់ដែលអាចជាអធិការបតីបន្ទាប់លោកហ្វ្រីឌ្រីច មើស (Friedrich Merz) អំពីការប្រើប្រាស់អាវុធរបស់អ៊ុយក្រែន។ លោកបាននិយាយថា វាច្បាស់ណាស់ថា មីស៊ីលទាំងនេះមិនអាចផ្លាស់ប្តូរអ្វីបានគួរឱ្យកត់សម្គាល់នៅក្នុងដំណើរការនៃប្រតិបត្តិការយោធាឡើយ។

លោកប្រធានាធិបតីបារាំង Emmanuel Macron និងនាយករដ្ឋមន្ត្រីអង់គ្លេស Keir Starmer បានបញ្ជាក់ជាថ្មីនូវការគាំទ្ររបស់ខ្លួនចំពោះទីក្រុង Kyiv ក្នុងអំឡុងកិច្ចពិភាក្សានៅទីក្រុងប៉ារីសកាលពីថ្ងៃចន្ទ ស្របពេលរដ្ឋមន្ត្រីការបរទេសបារាំងបានជំរុញសម្ព័ន្ធមិត្តរបស់អ៊ុយក្រែនកុំឱ្យវិនិច្ឆ័យទុកជាមុនអំពីរមធ្យោបាយដែលលោក Trump នឹងដោះស្រាយជម្លោះនេះ ។

លោក Medvedev បាននិយាយថា វាគួរឱ្យភ្ញាក់ផ្អើលចំពោះទំហំដែលអ្នកនយោបាយអឺរ៉ុបបច្ចុប្បន្នចង់អូសទាញសង្រ្គាមចូលទៅក្នុងទឹកដីរបស់ពួកគេ៕