បាល់ទាត់៖ ការប្រកួតបាល់ទាត់ដណ្ដើមពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១ បានឈានដល់ថ្ងៃប្រកួតវគ្គពាក់កណ្ដាលផ្ដាច់ព្រ័ត្រហើយនៅរសៀលថ្ងៃទី២០ ខែតុលានេះដើម្បីស្វែងរកក្រុមខ្លាំងឡើងវគ្គផ្ដាច់ព្រ័ត្រ ក៏ដូចជាបេក្ខភាពត្រូវឡើងទៅលេងពានរង្វាន់សម្ដេចតេជោ-ថ្នាក់ជាតិ។
សម្រាប់កម្មវិធីប្រកួតវគ្គផ្ដាច់ព្រ័ត្រថ្ងៃនេះរួមមានក្រុម ស.ស.យ.ក ខេត្តបាត់ដំបងត្រូវជួបក្រុមមន្ទីរអប់រំ យុវជន និងកីឡាខេត្តត្បូងឃ្មុំ នៅកីឡដ្ឋានព្រីនស៍ និង ១គូទៀតគឺខេត្តបន្ទាយមានជ័យនឹងត្រូវជួបក្រុមខ្លាំងកោះកុងអេហ្វស៊ី នៅកីឡដ្ឋាន AEU Sport Park។ ការប្រកួតនេះ នឹងចាប់ផ្ដើមនាវេលាម៉ោង ៣រសៀលដំណាលគ្នាក្នុងនោះក្រុមការងារទូរទស្សន៍ BTV-News ក៏នឹងធ្វើការផ្សាយផ្ទាល់ ១គូនៃជំនួបរវាងខេត្តបន្ទាយមានជ័យ និងក្រុមកោះកុងអេហ្វស៊ីជូនប្រិយមិត្តបានទស្សនាកម្សាន្ដផងដែរ។ ដូចទៅនឹងការប្រកួតវគ្គ ៨ក្រុមចុងក្រោយការប្រកួតវគ្គដ៏សំខាន់នេះនឹងធ្វើឡើងតែ ១ជើងប៉ុណ្ណោះដើម្បីកំណត់ឈ្នះ-ចាញ់ តែបើប្រកួត ៩០នាទីស្មើគ្នា គណៈកម្មការនឹងតម្រូវឲ្យធ្វើការទាត់បាល់ប៉េណាល់ទីកាត់សេចក្ដីតែម្ដង។
ចំពោះក្រុមទទួលបានជ័យជម្នះក្នុងវគ្គពាក់កណ្ដាលផ្ដាច់ព្រ័ត្រ នឹងទទួលបានកៅអីវគ្គផ្ដាច់ព្រ័ត្រពានសម្ដេចតេជោ-ថ្នាក់ខេត្ត ហើយក៏ទទួលបានសិទ្ធចូលរួមប្រកួតពានសម្ដេចតេជោ-ថ្នាក់ជាតិឆ្នាំនេះដោយស្វ័យប្រវត្តិផងដែរ។ រីឯ ១ក្រុមទៀតដែលត្រូវឡើងបង្គ្រប់កៅអី ១៦ក្រុមនៃពានថ្នាក់ជាតិត្រូវរង់ចាំការប្រកួតដណ្ដើមចំណាត់ថ្នាក់លេខ៣ រវាងក្រុមចាញ់ប៉ះក្រុមចាញ់នៃពានថ្នាក់ខេត្តសិន។ សូមរំឭកថា មុនឈានដល់វគ្គពាក់កណ្ដាលផ្ដាច់ព្រ័ត្រ ខេត្តបាត់ដំបងបានទម្លាក់ខេត្តកណ្ដាលក្នុងលទ្ធផល ៧-១ នៅវគ្គ ៨ក្រុមចុងក្រោយ ខណៈខេត្តត្បូងឃ្មុំបានយកឈ្នះក្រុមភ្នំពេញហ្គាឡាក់ស៊ី ២-០។ ចំណែកក្រុមកោះកុងអេហ្វស៊ីបានយកឈ្នះខេត្តកំពង់ឆ្នាំងយ៉ាងចាស់ដៃ ៩-១ ស្របពេលខេត្តបន្ទាយមានជ័យបានយកឈ្នះក្រុមសៀមរាបអេហ្វស៊ី ១-០ ទាំងប្រផិតប្រផើយកាលពីចុងសប្ដាហ៍កន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
