កងកម្លាំងនគរបាលនៅរដ្ឋធានី Amsterdam កំពុងទប់ទល់នឹងភាពចលាចលមួយយប់ផ្សេងទៀតកាលពីថ្ងៃអង្គារសប្ដាហ៍នេះ ខណៈរដ្ឋធានីរបស់ប្រទេសហូឡង់មួយនេះ បានប្រឈមអំពើហិង្សាប្រឆាំងសាសនាដែលបានផ្ទុះឡើងដោយការវាយប្រហារលើក្រុមអ្នកគាំទ្របាល់ទាត់អ៊ីស្រាអែលដែលបានចូលទស្សនាការប្រកួតកាលពីសប្តាហ៍មុន។

រដ្ឋធានីរបស់ប្រទេសហូឡង់ត្រូវបានដាក់ឱ្យស្ថិតក្រោមវិធានគ្រាអាសន្នកាលពីថ្ងៃសុក្រសប្តាហ៍មុន បន្ទាប់ពីមានការប៉ះទង្គិចគ្នាដែលបានផ្ទុះឡើងក្រោយការប្រកួតបាល់ទាត់កាលពីយប់ថ្ងៃព្រហស្បតិ៍រវាងក្រុម Maccabi Tel Aviv របស់អ៊ីស្រាអែល និងក្រុម Ajax របស់ប្រទេសហូឡង់។

ការតវ៉ាភាគច្រើនត្រូវបានហាមប្រាម ហើយវត្តមាននគរបាលត្រូវបានពង្រឹងនៅទូទាំងរដ្ឋធានីនេះ ប៉ុន្តែអំពើហិង្សាពុំបានធូរស្រាលឡើយ។

គួររម្លឹកថាអំពើហិង្សាកាលពីថ្ងៃចន្ទដើមសប្ដាហ៍នេះ បានផ្ទុះឡើង បន្ទាប់ពីមនុស្សជាង៥០នាក់ត្រូវបានចាប់ខ្លួននៅកន្លែងតវ៉ាគាំទ្រជនជាតិប៉ាឡេស្ទីនដែលមិនត្រូវបានអនុញ្ញាតនៅកណ្ដាលរដ្ឋធានី Amsterdamកាលពីថ្ងៃអាទិត្យចុងសប្ដាហ៍កន្លងទៅ។

ការប៉ះទង្គិចគ្នាជាបន្តបន្ទាប់ បានកើតឡើងក្រោយម៉ោង៧យប់ កាលពីថ្ងៃចន្ទដើមសប្ដាហ៍នេះ នៅភាគខាងលិចទីក្រុង Amsterdam ជាទីដែលរថភ្លើងមួយត្រូវបានដុតបំផ្លាញ បង្អួចត្រូវបានវាយកម្ទេច ហើមក្រុមអ្នកតវ៉ាបានគប់ដុំថ្មលើកងកម្លាំងនគរបាល។ 

ស្នងការនគរបាលក្រុង Amsterdam លោក Olivier Dutilh បាននិយាយថា កម្លាំងរបស់លោកកំពុងត្រៀមសម្រាប់រាត្រីដ៏ច្របូកច្របល់មួយទៀតនៅសប្ដាហ៍នេះ។មានការអំពាវនាវឱ្យមានស្ថានភាពស្រដៀងគ្នានៅភាគខាងលិចទីក្រុង Amsterdam ។ ដូច្នេះ ស្ត្រី និងកុមារ ត្រូវស្នាក់នៅក្នុងផ្ទះ៕