តំបន់ជាច្រើនដែលរងគ្រោះទឹកជំនន់នៅជិតទីក្រុង Valencia ភាគខាងកើត បានប្រញាប់ប្រញាល់ ដើម្បីសម្អាតប្រព័ន្ធលូ និងដាក់បាវខ្សាច់ជាច្រកទ្វារទឹកជំនន់បណ្តោះអាសន្ន ខណៈពួកគេត្រៀមទប់ទល់សម្រាប់ព្យុះដ៏មានឥទ្ធិពលមួយផ្សេងទៀត។

រយៈពេលពីរសប្តាហ៍ បន្ទាប់ពីទឹកជំនន់ដ៏មហន្តរាយបំផុតនៅក្នុងប្រវត្តិសាស្ត្ររបស់ប្រទេសអេស្ប៉ាញនាសម័យទំនើបនេះដែលបានបណ្តាលឲ្យមនុស្សជាង២០០នាក់ស្លាប់ អង្គភាពសេវាអាកាសធាតុជាតិ  បានចេញការព្រមានពណ៌ទឹកក្រូច ជាកម្រិតខ្ពស់បំផុតទីពីរសម្រាប់ភ្លៀងធ្លាក់ខ្លាំង ដោយចាប់ផ្តើម ពីយប់ថ្ងៃអង្គារ។

អង្គភាពសេវាអាកាសធាតុជាតិ  ព្យាករណ៍ថា នឹងមានភ្លៀងធ្លាក់រហូតដល់ ១២០មីលីម៉ែត្រ ក្នុងរយៈពេល១២ម៉ោង ហើយទោះបីជាព្យុះនេះ ពុំត្រូវបានគេរំពឹងថានឹងមានកម្លាំងខ្លាំងដូចកាលពី២សប្តាហ៍មុនក៏ដោយ វាអាចបំផ្លាញទីក្រុងនានា ដែលតែកំពុងព្យាយាមស្តារឡើងវិញ។

គណៈកម្មាធិការសង្គ្រោះបន្ទាន់របស់ទីក្រុង Valencia បានចេញការព្រមានពិសេសមួយដល់ក្រុង និងអង្គការនានា ដោយស្នើឱ្យពួកគេអនុម័តវិធានការបង្ការជាមុន រួមទាំងការបិទសាលារៀន ប្រសិនបើសិស្សត្រូវធ្វើដំណើរ។

គណៈកម្មាធិការ ក៏បានផ្តល់ការណែនាំឱ្យប្រជាជនធ្វើការពីលំនៅឋាន ឬពីចម្ងាយតាមដែលអាចធ្វើទៅបាន ជៀសវាងការធ្វើដំណើរមិនចាំបាច់ និងតាមដានការធ្វើបច្ចុប្បន្នភាពរបស់អង្គភាពសេវាសង្គ្រោះបន្ទាន់។