រដ្ឋាភិបាលនៃរដ្ឋសមុទ្រក្រហមរបស់ប្រទេសស៊ូដង់ កាលពីថ្ងៃអង្គារ បានជំរុញសហគមន៍អន្តរជាតិ និងអង្គការមនុស្សធម៌ ឱ្យគាំទ្រកិច្ចខិតខំប្រឹងប្រែងរបស់ខ្លួនដើម្បីផ្តល់តម្រូវការជាមូលដ្ឋានសម្រាប់ជនភៀសខ្លួនរាប់ពាន់នាក់ នៅក្នុងតំបន់។

លោកស្រី Ilham Idris Gasmalla រដ្ឋមន្ត្រីសុខុមាលភាពសង្គមនៅរដ្ឋសមុទ្រក្រហម បាននិយាយថា «រដ្ឋនេះ កំពុងទទួលជនភៀសខ្លួនក្នុងចំនួនដ៏ច្រើន ហើយចំនួននេះនៅកើនឡើងថែមទៀត។

លោកស្រី និយាយថា យើងផ្តល់ការគាំទ្រអ្វីក៏ដោយ ដែលយើងអាចធ្វើបានសម្រាប់ប្រជាជនដ៏ច្រើននេះ ប៉ុន្តែមានកង្វះការផ្តល់សេវា ដែលយើងកំពុងធ្វើការ ដើម្បីដោះស្រាយ។

លោកស្រី Gasmalla បានអំពាវនាវសុំជំនួយអន្តរជាតិ ដោយសង្កត់ធ្ងន់លើតម្រូវការបន្ទាន់សម្រាប់សម្ភារៈទីជម្រក ការផ្គត់ផ្គង់វេជ្ជសាស្រ្ត និងធនធានអនាម័យបរិស្ថានសម្រាប់ជនភៀសខ្លួន។

លោកស្រី និយាយថា មានកង្វះខាតតង់យ៉ាងច្រើន ហើយដោយរដូវវស្សាចាប់ផ្តើមនៅក្នុងរដ្ឋសមុទ្រក្រហម យើងត្រូវការថ្នាំពេទ្យបន្ទាន់ ដើម្បីប្រយុទ្ធប្រឆាំងជំងឺរាតត្បាតតាមរដូវកាលដែលត្រូវបានរំពឹងទុក ដូចជាគ្រុនក្តៅ រួមជាមួយនឹងការផ្គត់ផ្គង់អនាម័យ និងការគ្រប់គ្រងជំងឺ។

លោកស្រី Gasmalla បានកត់សម្គាល់ពីកិច្ចខិតខំប្រឹងប្រែងរបស់គណៈកម្មការជំនួយមនុស្សធម៌របស់រដ្ឋាភិបាលសហព័ន្ធ និងរដ្ឋាភិបាលរដ្ឋ ដើម្បីបំពេញតម្រូវការជាមូលដ្ឋានរបស់ជនភៀសខ្លួន។

រដ្ឋាភិបាលតំបន់ បានបែងចែកមជ្ឈមណ្ឌលចំនួន៨០កន្លែង នៅក្នុងទីក្រុង Port Sudan ជារដ្ឋធានីរបស់រដ្ឋ ដើម្បីដាក់គ្រួសារជនភៀសខ្លួនឲ្យស្នាក់នៅប្រមាណ២១.០០០គ្រួសារ ដែលសរុបមានចំនួនប្រហែល ១០៥.០០០នាក់។