​បាល់ទាត់៖ ​ខ្សែប្រយុទ្ធ​អា​ហ្ស​ង់​ទីន Lionel Messi រកបាន​ពីរ​គ្រាប់​ម្នាក់ឯង​ឱ្យ Paris Saint Germain វាយបក​ពីក្រោយ ២-១ យកឈ្នះ ៣-២ លើ​ក្រុម​ភ្ញៀវ​អាល្លឺម៉ង់ RB Leipzig ក្នុង​ពូ​ល A ក្របខណ្ឌ UEFA Champions League​។ ​​ខ្សែប្រយុទ្ធ​បារាំង Kylian Mbappe គឺជា​អ្នក​រកបាន​គ្រាប់​នាំមុខ​មុន​ឱ្យ​ម្ចាស់ផ្ទះ PSG នៅ​នាទី​ទី៩ តែ Leipzig ក៏​វាយបក​ពីរ​គ្រាប់​វិញ​នៅ​នាទី​ទី២៨ ដោយ Andre Silva និង​នាទី​ទី៥៧ ដោយ Nordi Mukiele​។

​​ក្រោយមក Mbappe បញ្ជូន​បាល់​ឱ្យ Messi ស៊ុត​បញ្ចូល​ទី​តាម​ស្មើ​នៅ​នាទី​ទី៦៧ មុនពេល​ដែល Mbappe ដដែលដួល​នៅក្នុង​ប្រអប់​គ្រោះថ្នាក់​ហើយ Messi គឺជា​អ្នក​ស៊ុត​បាល់ ១១ម៉ែត្រ Panenka ឱ្យ PSG យកឈ្នះ Leipzig ៣-២​។ ​​បី​ពិន្ទុ​នេះ​ធ្វើឱ្យ​ក្រុម​របស់លោក Mauricio Pochettino បន្ត​ការ​នាំមុខ​ក្នុង​ពូ​ល A នេះ​មាន ៧ពិន្ទុ​ខណៈ Leipzig បន្ត​ចាញ់ ៣ប្រកួត​ជាប់​គ្នា​។ ​ងាក​មក​មួយគូ​ទៀត​ក្នុង​ពូ​ល A នេះដែរ Manchester City បាន​លើកទ័ព​ទៅយក​បី​ពិន្ទុ​ពី​ក្រុម​ម្ចាស់ផ្ទះ Club Bruges ៥-១​។

​​Riyad Mahrez រកបាន​ពីរ​គ្រាប់​ក្នុងការ​ប្រកួត​នេះ​ ខណៈ Cole Palmer រកបាន​គ្រាប់​ដំបូង​នៅ UCL​។ ​​Joao Cancelo និង Kyle Walker រកបាន​ម្នាក់​មួយគ្រា​ប់​ផងដែរ​ក្នុងចំណោម ៥គ្រាប់​នេះ ​ខណៈ​ក្រុម​ម្ចាស់ផ្ទះ​ប៊ែ​ល​ហ្ស៊ិ​កតប​បាន​ ១​គ្រាប់​នៅ​នាទី​ទី៨១ ដោយ Hans Vanaken​។ ​​ក្រុម​របស់លោក Pep Guardiola បន្ត​ឈរ​លេខ២ ក្នុង​ពូ​ល A នេះ​មាន ៦ពិន្ទុ ​ខណៈ Club Bruges ឈរ​លេខ៣ មាន ៤ពិន្ទុ​៕

​អត្ថបទ​៖​នាង សុភា​វុ​ធ