អ្នកយកព័ត៌មានឲ្យគេហទំព័រ Axios លោក Barak Ravid បាននិយាយ ដោយដកស្រង់សម្តីមន្ត្រីអាមេ     រិកថា រដ្ឋមន្ត្រីការបរទេសអាមេរិក លោក អង់តូនី ប្ល៊ីនខិន ( Antony Blinken) បានធ្វើការសម្រេចចិត្ត បន្តផ្គត់ផ្គង់អាវុធដល់អ៊ីស្រាអែល បន្ទាប់ពីឱសានវាទរបស់ទីក្រុងវ៉ាស៊ីនតោន សម្រាប់ការកែលម្អស្ថានភាពមនុស្សធម៌ នៅតំបន់ហ្កាហ្សាហ្សា ផុតសុពលភាព។ 

លោកបានសរសេរថា៖«រដ្ឋមន្ត្រីការបរទេសអាមេរិក លោក អង់តូនី ប្ល៊ីនខិន បានសម្រេចចិត្តមិនផ្អាកជំនួយយោធាដល់អ៊ីស្រាអែល បន្ទាប់ពីរដ្ឋាភិបាលអ៊ីស្រាអែល បានចាត់វិធានការមួយចំនួន ដើម្បីកែលម្អលំហូរនៃជំនួយមនុស្សធម៌ ទៅកាន់តំបន់ហ្កហ្សា។ យោងតាមអ្នកកាសែតរូបនេះ ជំនួយការជាន់ខ្ពស់មួយចំនួនរបស់ លោក ប្ល៊ីនខិន និងមន្ត្រីជាន់ខ្ពស់សេតវិមាន បានគិតថា ឱសានវាទមានប្រសិទ្ធភាព ហើយបានជំរុញឲ្យអ៊ីស្រាអែលផ្លាស់ប្តូរទិសដៅ។ ពួកគេបានតស៊ូមតិឲ្យបន្តដាក់សម្ពាធលើអ៊ីស្រាអែលលើបញ្ហានេះ ជំនួសឲ្យការផ្អាកការផ្គត់ផ្គង់អាវុធ»។

អ្នកនាំពាក្យរងក្រសួងការបរទេសអាមេរិក លោក Vedant Patel បាននិយាយនៅក្នុងសន្និសីទសារព័ត៌មានថា អ៊ីស្រាអែល បានចាត់វិធានការជាច្រើន ដើម្បីដោះស្រាយវិបត្តិមនុស្សធម៌ នៅតំបន់ហ្កាហ្សា ដើម្បីឆ្លើយតបទៅនឹងការទាមទាររបស់សហរដ្ឋអាមេរិក។ លោកបានបន្ថែមថា៖«នៅពេលនេះ យើងមិនទាន់ធ្វើការវាយតម្លៃថា អ៊ីស្រាអែល បំពានច្បាប់សហរដ្ឋអាមេរិកទេ។ យើងនឹងបន្តឃ្លាំមើល និងវាយតម្លៃការអនុលោមតាមច្បាប់របស់សហរដ្ឋអាមេរិក»។ អ្នកនាំពាក្យរូបនេះ បានសង្កត់ធ្ងន់ថា៖«ប្រសិនបើយើងមិនបន្តមើលឃើញជំហានក្នុងទិសដៅសមស្របទេ យើងនឹងអនុវត្តច្បាប់របស់សហរដ្ឋអាមេរិក»។