ប្រធានាធិបតីឥណ្ឌូនេស៊ី លោក Prabowo Subianto បានជួបជាមួយប្រធានាធិបតីអាមេរិក លោក Joe Biden នៅសេតវិមាន កាលពីថ្ងៃអង្គារ (ទី១២ ខែវិច្ឆិកា) ហើយបានសម្ដែងការអបអរដល់ប្រធានាធិបតីជាប់ឆ្នោត លោក Donald Trump តាមទូរសព្ទ ក្នុងអំឡុងពេលទស្សនកិច្ចផ្លូវការ នៅទីក្រុងវ៉ាស៊ីនតោន។

នៅទីនោះ លោក Prabowo បាននិយាយថា៖ «ខ្ញុំនឹងខិតខំប្រឹងប្រែងយ៉ាងខ្លាំងក្លា ដើម្បីពង្រឹងទំនាក់ទំនងឥណ្ឌូនេស៊ី-សហរដ្ឋអាមេរិក ហើយខ្ញុំចង់ធ្វើការឆ្ពោះទៅរកទីបញ្ចប់នេះ ដែលយើងនឹងមានកិច្ចសហប្រតិបត្តិការដ៏រឹងមាំ»។

លោក Prabowo ដែលបាននិយាយថា លោកនឹងបន្តគោលនយោបាយការបរទេសមិនចូលបក្សសម្ព័ន្ធបានជួបជាមួយលោក Biden នៅក្នុងការិយាល័យ Oval បន្ទាប់ពីបានបង្ហោះវីដេអូនៃការជជែកតាមទូរសព្ទរបស់លោកជាមួយលោក Trump ។

លោកបានទៅដល់ទីក្រុងវ៉ាស៊ីនតោនដោយធ្វើដំណើរត្រង់ចេញពីប្រទេសចិន ជាកន្លែងដែលលោកបានជួបប្រធានាធិបតីចិន លោក Xi Jinping ក្នុងដំណើរទស្សនកិច្ចក្រៅប្រទេសលើកដំបូងរបស់លោក ចាប់តាំងពីចូលកាន់តំណែង ក្នុងខែតុលា។

គួរបញ្ជាក់ថា ទីក្រុងវ៉ាស៊ីនតោនមើលឃើញឥណ្ឌូនេស៊ី ជាប្រទេសដែលមានប្រជាជនច្រើនជាងគេនៅអាស៊ីអាគ្នេយ៍ ជាដៃគូដ៏សំខាន់នៅក្នុងតំបន់ដែលគូប្រជែងរបស់ខ្លួន គឺទីក្រុងប៉េកាំង មានទំនាក់ទំនងពាណិជ្ជកម្ម និងការវិនិយោគយ៉ាងស៊ីជម្រៅជាមួយ។ ឥណ្ឌូនេស៊ីក៏ជាប្រទេសដែលមានប្រជាជនម៉ូស្លីមច្រើនជាងគេបំផុត នៅលើពិភពលោកផងដែរ៕