នៅថ្ងៃពុធនេះ ពលរដ្ឋលីបង់នៅទីក្រុងបេរូត បានបង្ហាញក្តីបារម្ភពីស្ថានភាពកើនឡើងនៅក្នុងប្រទេសលីបង់ ក្រោយយោធាអ៊ីស្រាអែល បង្កើនការវាយប្រហាររបស់ខ្លួននៅតំបន់ជាយក្រុងភាគខាងត្បូងទីក្រុងបេរូត ជាមួយនឹងការវាយប្រហារតាមច្រកអាកាសទាំងថ្ងៃលើតំបន់គ្រប់គ្រងដោយក្រុមហេសបូឡា និងវាយប្រហារលើតំបន់ភាគកណ្តាលប្រទេស ដោយបានសម្លាប់មនុស្សជាង ២០នាក់ ។

លោក Hassan Mohammad Moussa គឺជាពលរដ្ឋលីបង់មួយរូប និយាយថា ស្ថានភាពសន្តិសុខកាន់តែអាក្រក់ទៅពី ១ថ្ងៃ ទៅ ១ថ្ងៃ អ្វីៗកាន់តែតានតឹងខ្លាំង ពី ១ថ្ងៃទៅ ១ថ្ងៃ ។

អ៊ីស្រាអែល បាននិយាយថា ពួកគេបានចាត់វិធានការកាត់បន្ថយផលប៉ះពាល់លើជនស៊ីវិល ហើយពួកគេបាននិយាយម្តងហើយម្តងទៀតពីការចោទប្រកាន់ថា ក្រុមហេសបូឡា មានចេតនាលាក់បំពួនក្នុងតំបន់ជនស៊ីវិល ដើម្បីប្រើប្រាស់អ្នកស្រុកជាខែលមនុស្ស គឺជាការចោទប្រកាន់មួយដែលក្រុមហេសបូឡា ធ្វើការច្រានចោលទាំងស្រុង ។

ក្រសួងសុខាភិបាលលីបង់ និយាយថា នៅខេត្តភាគកណ្តាលប្រទេសលីបង់ ការវាយប្រហាររបស់អ៊ីស្រាអែលកាលពីថ្ងៃអង្គារ បានសម្លាប់មនុស្ស ៨នាក់ នៅក្នុងភូមិ Baalchmay ស្ថិតនៅភាគអាគ្នេយ៍ទីក្រុងបេរូត និងបានសម្លាប់មនុស្ស ១៥នាក់នៅក្នុងភូមិ Joun ស្ថិតក្នុងស្រុក Chouf ។

បង្កឡើងដោយសារសង្រ្គាមហ្កាហ្សា ជម្លោះរវាងអ៊ីស្រាអែល និងក្រុមហេសបូឡាគាំទ្រដោយអ៊ីរ៉ង់ បានអូសបន្លាយពេលជិត ១ឆ្នាំ មុនពេលអ៊ីស្រាអែលបើកការវាយប្រហារតាមជើងគោកកាលពីខែកញ្ញា ។

ចាប់តាំងពីជម្លោះផ្ទុះឡើងកាលពីរយៈពេល ១ឆ្នាំមុន ការវាយប្រហាររបស់អ៊ីស្រាអែល បានសម្លាប់មនុស្ស ៣.២៨៧នាក់នៅប្រទេសលីបង់ ដែលភាគច្រើននៃអ្នកស្លាប់ បានកើតឡើងក្នុងរយៈពេល ៧សប្តាហ៍ចុងក្រោយនេះ ៕