ប្រធានាធិបតីអាមេរិក លោក Joe Biden នឹងទទួលស្វាគមន៍ប្រធានាធិបតីជាប់ឆ្នោត លោក Donald Trump នៅសេតវិមាន នាថ្ងៃពុធ (ទី១៣ ខែវិច្ឆិកា) នេះ សម្រាប់កិច្ចប្រជុំមួយដែលត្រូវបានបង្កើតឡើង ដើម្បីបង្ហាញពីការផ្ទេរអំណាចយ៉ាងរលូន រវាងរដ្ឋបាលចាស់ និងថ្មី ទោះបីជាក្រុមរបស់លោក Trump មិនទាន់មានឯកសារដែលត្រូវបានចុះហត្ថលេខានៅឡើយទេ ដើម្បីចាប់ផ្តើមដំណើរការប្រគល់អំណាចនេះ។

លោក Biden ដែលដំបូងឡើយ បានឈរឈ្មោះប្រជែងនឹងលោក Trump ក្នុងការបោះឆ្នោតឆ្នាំ២០២៤ មុនពេលដកខ្លួនចេញ និងគាំទ្រអនុប្រធានាធិបតី លោកស្រី Kamala Harris ជាបេក្ខភាពរបស់គណបក្សប្រជាធិបតេយ្យ នឹងស្វាគមន៍អតីត និងអនាគតប្រធានាធិបតី នៅការិយាល័យ Oval ជាការសម្ដែងការគួរសមដោយប្រធានាធិបតីជិតផុតអាណត្តិដែលលោក Trump ទៅពីគណបក្សសាធារណរដ្ឋ មិនបានធ្វើបែបនេះ ចំពោះលោក Biden ក្នុងឆ្នាំ២០២០ នៅពេលដែលលោកបានឈ្នះការបោះឆ្នោត។

ពាក់ព័ន្ធនឹងការសម្រេចអញ្ជើញលោក Trump អ្នកនាំពាក្យសេតវិមាន លោកស្រី Karine Jean-Pierre កាលពីថ្ងៃអង្គារ (ទី១២ ខែវិច្ឆិកា) បានប្រាប់អ្នកសារព័ត៌មានថា៖ «លោកជឿជាក់លើបទដ្ឋាន លោកជឿជាក់លើស្ថាប័នរបស់យើង លោកជឿជាក់លើការផ្ទេរអំណាច ដោយសន្តិវិធី។ នោះហើយជាបទដ្ឋាន។ នោះគឺជាអ្វីដែលត្រូវតែកើតឡើង»។

លោក Biden និងលោក Trump បានរិះគន់គ្នាទៅវិញទៅមកយ៉ាងខ្លាំងក្លាអស់រយៈពេលជាច្រើនឆ្នាំហើយ ហើយក្រុមរបស់ឥស្សរជនទាំង២ មានជំហរខុសៗគ្នាជាច្រើនលើគោលនយោបាយនានា រាប់ចាប់ពីបញ្ហាបម្រែបម្រួលអាកាសធាតុ ទៅបញ្ហារុស្ស៊ី រហូតដល់បញ្ហាពាណិជ្ជកម្ម។ លោក Biden វ័យ ៨១ឆ្នាំ បានពណ៌នាពីលោក Trump ថា ជាការគំរាមកំហែងដល់លទ្ធិប្រជាធិបតេយ្យ ខណៈដែលលោក Trump វ័យ ៧៨ឆ្នាំ បានពណ៌នាលោក Biden ថា អសមត្ថភាព។ លោក Trump បានធ្វើការអះអាងមិនពិត អំពីការក្លែងបន្លំយ៉ាងទូលំទូលាយ នៅក្នុងការបោះឆ្នោតឆ្នាំ២០២០៕