ការផ្ទុះបានជះពន្លឺពេញទីក្រុងគីវនៅព្រឹកថ្ងៃពុធនេះ ក្រោយក្រុមមន្រ្តីនិយាយថា រុស្ស៊ីបានបើកការវាយប្រហារដោយមីស៊ីលលើកដំបូងលើរដ្ឋធានីប្រទេសអ៊ុយក្រែនមួយនេះ ចាប់តាំងពីខែសីហា បង្ខំឲ្យស្រ្តីវ័យចំណាស់ និងក្មេងតូចៗរត់រកទីជម្រកនៅក្នុងស្ថានីយ៍រថភ្លើងក្រោមដី ។

អ៊ុយក្រែន រង់ចាំការវាយប្រហារដោយមីស៊ីលទ្រង់ទ្រាយធំអស់រយៈពេលជាច្រើនខែមកហើយ ដោយពួកគេព្រួយបារម្ភថា វាអាចធ្វើឲ្យមានការប៉ះទង្គិចថ្មីដល់ប្រព័ន្ធថាមពលខូចស្រាប់ ហើយនិងបណ្តាលឲ្យមានការដាច់ចរន្តអគ្គិសនីរយៈពេលយូរ ស្របពេលដែលរដូវរងាខិតជិតមកដល់ ។

កងទ័ពអាកាសអ៊ុយក្រែននិយាយថា ប្រព័ន្ធការពារដែនអាកាស បានបាញ់ស្កាត់មីស៊ីលតម្រង់គោលដៅ ២គ្រាប់ មីស៊ីលបាលីស្ទិក ២គ្រាប់ និងយានដ្រូន ៣៧គ្រឿងនៅទូទាំងប្រទេស ។ គ្មានគ្រោះថ្នាក់ ឬការខូចខាតទ្រង់ទ្រាយធំ ត្រូវបានរាយការណ៍នោះទេនៅក្នុងទីក្រុងគីវ ។

អ្នកស្រី Yulia Chernysevych វ័យ ៣៣ឆ្នាំ គឺជាពលរដ្ឋរស់នៅក្នុងទីក្រុងគីវ និយាយថា វាគួរឲ្យខ្លាចខ្លាំងណាស់ រាល់ពេលមានការវាយប្រហារដោយមីស៊ីល ។ 

អ្នកស្រីបន្តថា ពួកយើងបានស៊ាំនឹងការវាយប្រហារដោយយានដ្រូន Shahed ដោយសារវាបានហោះរាល់យប់ ។ តំបន់គីវ តែងតែរងគ្រោះ ក្មេងៗមិនអាចទៅសាលារៀនបានទេ ពេលដែលយានដ្រូនហោះលើមេឃ ហើយពេលដែលមានការវាយប្រហារដោយមីស៊ីល ពួកយើងបានរត់ទៅក្នុងទីជម្រក ៕