រដ្ឋមន្ត្រីការបរទេសអាមេរិក លោក Antony Blinken នៅថ្ងៃពុធ (ទី១៣ ខែវិច្ឆិកា) នេះ បានធានាដល់អង្គការសន្ធិសញ្ញាអាត្លង់ទិកខាងជើង (NATO) ថា រដ្ឋបាលរបស់លោក Joe Biden នឹងជំរុញដល់ការគាំទ្ររបស់ខ្លួន សម្រាប់អ៊ុយក្រែន ក្នុងរយៈពេល ២-៣ខែនេះ មុនពេលលោក Donald Trump វិលត្រឡប់ទៅកាន់តំណែងប្រធានាធិបតីវិញ ហើយនឹងព្យាយាមពង្រឹងសម្ព័ន្ធភាព នៅក្នុងពេលនោះ។

ក្នុងជំនួបជាមួយអគ្គលេខាធិការអង្គការណាតូ លោក Mark Rutte នៅទីក្រុងប្រ៊ុចសែល ប្រទេសបែលហ្ស៊ិក លោក Blinken ក៏បានលើកឡើងផងដែរថា ការដាក់ពង្រាយកងទ័ពកូរ៉េខាងជើង ដើម្បីជួយរុស្ស៊ី ក្នុងសង្គ្រាម នៅអ៊ុយក្រែន នឹងទទួលបាន «ការឆ្លើយតបយ៉ាងម៉ឺងម៉ាត់»។

ប្រធានាធិបតីជាប់ឆ្នោត លោក Trump ដែលបានចោទសួរពីការគាំទ្រផ្នែកយោធារបស់សហរដ្ឋអាមេរិក សម្រាប់អ៊ុយក្រែន និយាយថា លោកនឹងបញ្ចប់សង្រ្គាមរបស់រុស្ស៊ីយ៉ាងឆាប់រហ័ស ដោយមិនប្រាប់ពីវិធីណានោះទេ ដោយធ្វើឲ្យការព្រួយបារម្ភកាន់តែខ្លាំងឡើងៗ ក្នុងចំណោមសម្ព័ន្ធមិត្តរបស់សហរដ្ឋអាមេរិក ដែលថា លោកអាចព្យាយាមបង្ខំឲ្យទីក្រុងគីវទទួលយកសន្តិភាពតាមលក្ខខណ្ឌរបស់ទីក្រុងមូស្គូ។ លោក Biden ត្រូវចាកចេញពីតំណែង នៅថ្ងៃទី២០ ខែមករា។

បន្ទាប់ពីជួបជាមួយលោក Rutte នៅទីស្នាក់ការកណ្តាលរបស់សម្ព័ន្ធភាព លោក Blinken បាននិយាយថា អ្នកទាំង២ បានពិភាក្សាអំពីការគាំទ្រជាបន្តបន្ទាប់ សម្រាប់អ៊ុយក្រែន ជាកន្លែងដែលកងកម្លាំងរុស្ស៊ីបាននិងកំពុងមានប្រៀប នៅសមរភូមិជួរមុខភាគខាងកើត និងអំពីការងារ ដែលអង្គការណាតូត្រូវតែពង្រឹងមូលដ្ឋានឧស្សាហកម្មការពារជាតិរបស់ខ្លួន។

លោកបាននិយាយថា រដ្ឋបាលសហរដ្ឋអាមេរិកជិតផុតអាណត្តិ នឹង «បន្តជំរុញនូវអ្វីគ្រប់យ៉ាងដែលយើងកំពុងធ្វើសម្រាប់អ៊ុយក្រែន»៕