ក្រុមហេសបូឡា បាននិយាយថា ខ្លួនបានបើកការវាយប្រហារដោយយានដ្រូន ដោយដាក់គោលដៅលើទីបញ្ជាការយោធា និងក្រសួងការពារជាតិរបស់អ៊ីស្រាអែល នៅក្នុងទីក្រុង Tel Aviv កាលពីថ្ងៃពុធ។

នៅក្នុងសេចក្តីថ្លែងការណ៍ ក្រុមសកម្មប្រយុទ្ធលីបង់ បាននិយាយថា ខ្លួនបានវាយប្រហារតាមអាកាស ដោយក្រុមយានដ្រូនបំផ្ទុះលើទីតាំងស្ថាប័នការពារជាតិសំខាន់ៗរបស់អ៊ីស្រាអែល នៅក្នុងមជ្ឈមណ្ឌលពាណិជ្ជកម្ម។

ការិយាល័យអ្នកនាំពាក្យយោធាអ៊ីស្រាអែល បានប្រាប់សារព័ត៌មាន AFP ថា ខ្លួននឹងមិនធ្វើអត្ថាធិប្បាយលើការអះអាងរបស់ក្រុមហេសបូឡាឡើយ។ នៅក្នុងសេចក្តីថ្លែងការណ៍ចំនួនពីរ កាលពីថ្ងៃពុធ យោធា បាននិយាយថា ខ្លួនបានស្ទាក់ចាប់យានដ្រូនចំនួនពីរគ្រឿង និងមីស៊ីលចំនួន៤០គ្រាប់ ដែលត្រូវបានបាញ់ចេញពីប្រទេសលីបង់ ក្នុងការវាយប្រហារដែលពុំបណ្តាលឱ្យមានអ្នករងរបួសឡើយ។

សេចក្តីថ្លែងការណ៍ ពុំបានបញ្ជាក់ថាទីតាំងណាដែលត្រូវបានកំណត់គោលដៅនោះទេ។

ក្រុមហេសបូឡា និងអ៊ីស្រាអែល មានសង្រ្គាមជាមួយគ្នាចាប់តាំងពីចុងខែកញ្ញា នៅពេលដែលយោធាអ៊ីស្រាអែលបង្កើនការវាយប្រហារតាមអាកាសរបស់ខ្លួនលើប្រទេសលីបង់ និងបានបញ្ជូនកងទ័ពជើងគោកឆ្លងកាត់ព្រំដែន។

ក្រុមហេសបូឡា បានចាប់ផ្តើមការវាយប្រហារលើអ៊ីស្រាអែលនៅឆ្នាំ២០២៣ ក្នុងសាមគ្គីភាពជាមួយក្រុមហាម៉ាសដែលជាសម្ព័ន្ធមិត្តរបស់ខ្លួន បន្ទាប់ពីការវាយប្រហាររបស់ក្រុមសកម្មប្រយុទ្ធប៉ាឡេស្ទីនមួយនេះ កាលពីថ្ងៃទី៧ ខែតុលា ទៅលើអ៊ីស្រាអែល។

យោងតាមក្រសួងសុខាភិបាលលីបង់ បានឱ្យដឹងថា មនុស្សជាង៣.៣០០នាក់ត្រូវបានសម្លាប់នៅក្នុងប្រទេសលីបង់ ចាប់តាំងពីអំពើហិង្សា ចាប់ផ្តើមកាលពីឆ្នាំមុន។