ស៊ីហ្គេម៖ គណៈកម្មាធិការជាតិអូឡាំពិកវៀតណាមបានសន្យាជួយបណ្ដុះបណ្ដាល និងចែករំលែកបទពិសោធន៍ដល់គណៈកម្មការជំនាញកម្ពុជា អំពីដំណើរការរៀបចំការប្រកួតកីឡាស៊ីហ្គេម ពិសេសជួយផ្សព្វផ្សាយពីព្រឹត្តិការណ៍ប្រវត្តិសាស្ដ្រឆ្នាំ២០២៣ នៅកម្ពុជា បន្ទាប់ពីវៀតណាមបានកំណត់ច្បាស់លាស់នឹងរៀបចំស៊ីហ្គេមលើកទី៣១ នាពាក់កណ្ដាលខែឧសភា ឆ្នាំ២០២២។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានបញ្ជាក់ថា ការអះអាងរៀបចំស៊ីហ្គេមលើកទី៣១ របស់ម្ចាស់ផ្ទះវៀតណាម ក៏ផលវិជ្ជមានសម្រាប់កម្ពុជាក្នុងធ្វើតេស្ដសមត្ថភាព និងបច្ចេកទេសរបស់ប្រតិភូ ពិសេសគណៈកម្មការជំនាញដើម្បីពង្រឹង និងកែតម្រូវផែនការរបស់ខ្លួនឲ្យបានមុតស្រួចត្រៀមឆ្ពោះទៅស៊ីហ្គេម ឆ្នាំ២០២៣។ លើសពីនេះ ឯកឧត្តមបានបង្ហាញសុទិដ្ឋិនិយមចំពោះការគាំទ្រឲ្យកម្ពុជា ធ្វើសហប្រធានក្រុមប្រឹក្សាកីឡាលអាស៊ីអាគ្នេយ៍ នៅចុងឆ្នាំនេះ ដែលជាយុទ្ធសាស្ដ្រឈ្នះឈ្នះទាំងអស់គ្នាក្នុងបរិបទកូវីដ។ អ្វីដែលពិសេស វៀតណាមបានបើកភ្លើងខៀវជួយដល់គណៈកម្មការជំនាញកម្ពុជាតាមរយៈការបណ្ដុះបណ្ដាល ចែករំលែកបទពិសោធន៍ក្នុងការរៀបចំព្រឹត្តិការណ៍ស៊ីហ្គេម ព្រមទាំងអនុញ្ញាតឲ្យកម្ពុជាធ្វើការផ្សព្វផ្សាយអំពីស៊ីហ្គេមឆ្នាំ២០២៣ អំឡុងការប្រកួតកីឡាស៊ីហ្គេមលើកទី៣១ នៅវៀតណាមនាពាក់កណ្ដាលឆ្នាំក្រោយទៀតផង។
សូមបញ្ជាក់ថា ទោះបីវៀតណាមបានអះអាងពីការរៀបចំស៊ីហ្គេមលើកទី៣១ នាពាក់កណ្ដាលខែឧសភា ឆ្នាំ២០២១ តែវៀតណាមមិនទាន់កំណត់ថ្ងៃប្រកួតនោះទេ។ យ៉ាងណាក្ដីកម្ពុជាបានត្រៀមខ្លួនជានិច្ច ទាំងប្រតិភូ និងមន្ដ្រីជំនាញដើម្បីបញ្ជូនទៅដកស្រង់បទពិសោធ និងរៀនសូត្របន្ថែម ពិសេសការត្រៀមរៀបចំនូវពិធីទទួលទង់ស៊ីហ្គេមឆ្នាំ២០២៣ បន្ដវេណពីវៀតណាមតែម្ដង ដើម្បីបង្ហាញ និងប្រកាសដល់បណ្ដាប្រទេសសមាជិកអាស៊ានថា ស៊ីហ្គេមឆ្នាំ២០២៣ នឹងរៀបចំការប្រកួតនៅប្រទេសកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
