ក្រុមប្រឹក្សាអធិបតេយ្យភាពរបស់ប្រទេសស៊ូដង់ បាននិយាយកាលពីថ្ងៃពុធថា ខ្លួនបានបន្ថែមពេលការប្រើប្រាស់ច្រកឆ្លងកាត់ព្រំដែន Adre ជាមួយប្រទេសឆាដ ដែលត្រូវបានគេមើលឃើញថាមានសារៈសំខាន់ដោយភ្នាក់ងារជំនួយសម្រាប់ការដឹកជញ្ជូនស្បៀងអាហារ និងការផ្គត់ផ្គង់ផ្សេងទៀតទៅកាន់តំបន់ដែលមានហានិភ័យនៃគ្រោះទុរ្ភិក្សនៅក្នុងតំបន់ Darfur និង Kordofan ។

អ្នកជំនាញ បានកំណត់កាលពីដើមឆ្នាំនេះថា ខណៈប្រជាជនជាង២៥លាននាក់នៅទូទាំងប្រទេសប្រឈមនឹងភាពអត់ឃ្លានធ្ងន់ធ្ងរ ផ្នែកជាច្រើនរបស់ប្រទេសកំពុងប្រឈមនឹងហានិភ័យនៃគ្រោះទុរ្ភិក្សកើនឡើង ហើយជំរំមួយនៅក្នុងតំបន់ Darfur បានស្ថិតក្នុងភាពធ្ងន់ធ្ងររួចទៅហើយ ជាផលវិបាកនៃសង្គ្រាមរវាង កងទ័ពស៊ូដង់ និងកងកម្លាំងគាំទ្ររហ័សយោធាប៉ារ៉ា។

ច្រកឆ្លងកាត់ Adre ដែលត្រូវបានបិទដោយបទបញ្ជាពីរដ្ឋាភិបាលគ្រប់គ្រងដោយកងទ័ព កាលពីខែកុម្ភៈ ត្រូវបានបើកឡើងវិញរយៈពេលបីខែក្នុងខែសីហា រហូតដល់ថ្ងៃទី១៥ ខែវិច្ឆិកា ហើយវាពុំច្បាស់នោះទេថាតើរយៈពេលប៉ុន្មាននឹងត្រូវបន្តទៅទៀត។

សមាជិករដ្ឋាភិបាល បានតវ៉ាប្រឆាំងការបើកនេះ ដោយនិយាយថា វាអនុញ្ញាតឱ្យកងកម្លាំងគាំទ្ររហ័សយោធាបប៉ារ៉ា(RSF) ដឹកជញ្ជូនអាវុធ។ ទោះជាយ៉ាងណា កងទ័ពស៊ូដង់ពុំស្ថិតក្រោមការគ្រប់គ្រងជាក់ស្តែងនៃច្រកព្រំដែនដែលស្ថិតនៅក្នុងទឹកដីដែលដណ្តើមយកបានកាលពីឆ្នាំមុនដោយកងកម្លាំងគាំទ្ររហ័សយោធាប៉ារ៉ា ដែលគ្រប់គ្រងភាគច្រើននៅទីក្រុង Darfur នោះទេ។

អង្គការសហប្រជាជាតិ បានស្វាគមន៍ការសម្រេចនេះដោយរក្សាច្រកឆ្លងកាត់ព្រំដែន Adre ឱ្យនៅបើកចំហ រយៈពេលបីខែទៀត។

អគ្គលេខាធិការអង្គការសហប្រជាជាតិ លោក Antonio Guterres បាននិយាយទៅកាន់មេបញ្ជាការកងទ័ពរបស់ស៊ូដង់ លោក Abdel Fattah al-Burhan នៅខាងក្រៅកិច្ចប្រជុំកំពូលអាកាសធាតុ COP29 នៅប្រទេសអាស៊ែបៃហ្សង់ កាលពីថ្ងៃពុធ អំពីសារៈសំខាន់នៃការសម្របសម្រួលការចែកចាយជំនួយមនុស្សធម៌នៅស៊ូដង់ និងជាពិសេសតាមរយៈច្រកឆ្លងកាត់ព្រំដែន Adre។