មន្ត្រីរដ្ឋបាលជាន់ខ្ពស់ បាននិយាយថា ប្រធានាធិបតីសហរដ្ឋអាមេរិក លោក Joe Biden នឹងជួបសមភាគីចិន លោក Xi Jinping ដែលទំនងជាពេលវេលាចុងក្រោយ នៅថ្ងៃសៅរ៍ ខណៈទីក្រុងប៉េកាំងត្រៀមសម្រាប់អំឡុងពេលប្រឈមមុខដាក់គ្នាបន្ថែមទៀតជាមួយទីក្រុងវ៉ាស៊ីនតោន ក្រោមការដឹកនាំរបស់ លោក Donald Trump ។

ទីប្រឹក្សាសន្តិសុខជាតិសហរដ្ឋអាមេរិក លោក Jake Sullivan បានប្រាប់អ្នកសារព័ត៌មានថា មេដឹកនាំទាំងពីរ ត្រូវបានគេរំពឹងថានឹងជួបពិភាក្សាគ្នាជុំវិញចំណុចក្តៅជាច្រើនជាសកល រួមទាំងភាពតានតឹងកាន់តែខ្លាំងឡើងរវាងទីក្រុងវ៉ាស៊ីនតោន និងទីក្រុងប៉េកាំងនៅខាងក្រៅវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក នៅទីក្រុងលីម៉ា ប្រទេសប៉េរូ។

មេដឹកនាំទាំងពីរ បានព្យាយាមទប់ភាពតានតឹង ជុំវិញបញ្ហាជាច្រើនរាប់ចាប់ពីកោះតៃវ៉ាន់ រហូតដល់សមុទ្រចិនខាងត្បូង និងសង្គ្រាមរបស់រុស្ស៊ី និងការទាមទាររបស់អាមេរិកសម្រាប់ជំនួយពីចិនបន្ថែមទៀតដើម្បីរារាំងលំហូរនៃសារធាតុហ្វង់តានីល។

ក្រុមមន្ត្រី បាននិយាយថា លោកBiden ក៏នឹងលើកឡើងពីការគាំទ្ររបស់ចិន សម្រាប់សង្គ្រាមរបស់រុស្ស៊ីនៅអ៊ុយក្រែន និងវត្តមានរបស់ទាហានកូរ៉េខាងជើងជាង១០.០០០នាក់នៅក្នុងប្រទេសរុស្ស៊ី។