ដោយសភារបស់ប្រទេសអ៊ីស្រាអែល បានអនុម័តច្បាប់កាលពីខែមុន ហាមឃាត់ទីភ្នាក់ងារផ្តល់ជំនួយសង្គ្រោះប៉ាឡេស្ទីន (UNRWA) ហើយដោយរដ្ឋបាលរបស់លោក ដូណាល់ ត្រាំ ចូលកាន់តំណែងលើកទីពីរនៅពេលខាងមុខ ប្រធានជំនួយរបស់អង្គការសហប្រជាជាតិ បានបង្ហាញពីឆន្ទៈក្នុងការធ្វើការជាមួយទីក្រុងវ៉ាស៊ីនតោន កាលពីថ្ងៃពុធ។

នៅក្រោមការគ្រប់គ្រងរបស់ លោក Biden សម្ព័ន្ធមិត្តរបស់អ៊ីស្រាអែល គឺសហរដ្ឋអាមេរិក បានចាត់ទុកតួនាទីរបស់ទីភ្នាក់ងារ UNRWA នៅក្នុងតំបន់ហ្កាហ្សា ថា «មិនអាចខ្វះបាន»។ ទោះជាយ៉ាងណា ច្បាប់នេះ នឹងត្រូវចូលជាធរមាននៅចុងខែមករា ត្រឹមតែប៉ុន្មានថ្ងៃបន្ទាប់ពីប្រធានាធិបតីជាប់ឆ្នោតថ្មីរបស់សហរដ្ឋអាមេរិក លោក Donald Trump ចូលកាន់តំណែងសម្រាប់អាណត្តិរយៈពេលបួនឆ្នាំ លើកទីពីរ។

នៅពេលត្រូវបានសួរក្នុងសន្និសីទសារព័ត៌មាន កាលពីថ្ងៃពុធថាតើលោកនឹងទាក់ទងទៅ លោកTrump ដែរឬទេ លោក Lazzarini បាននិយាយថា «ចម្លើយខ្លីគឺ ពិតណាស់» ។ លោក បាននិយាយថា «យើងស្ថិតនៅក្នុងស្ថានភាពថ្មី ជាក់ស្តែង វាជានៅពុំទាន់ច្បាស់។ នៅគ្រប់ស្ថានភាពថ្មី យើងក៏អាចមើលឃើញឱកាសថ្មីៗផងដែរ»។

អ៊ីស្រាអែលនិយាយថា បុគ្គលិករបស់ទីភ្នាក់ងារ UNRWA បានចូលរួមនៅក្នុងការវាយប្រហារកាលពីថ្ងៃទី៧ ខែតុលា ឆ្នាំ២០២៣ ជាការវាយប្រហាររបស់ក្រុមហាម៉ាសលើប្រទេសអ៊ីស្រាអែល ដែលបានបង្កឱ្យមានសង្រ្គាមនៅតំបន់ហ្កាហ្សា។ អង្គការសហប្រជាជាតិ បាននិយាយថា បុគ្គលិកទីភ្នាក់ងារ UNRWA ៩នាក់ប្រហែលជាជាប់ពាក់ព័ន្ធ ហើយត្រូវបានបណ្តេញចេញពីការងារ។ មេបញ្ជាការក្រុមហាម៉ាស់នៅប្រទេសលីបង់ដែលអ៊ីស្រាអែលបានសម្លាប់ ក៏ត្រូវបានរកឃើញថា បម្រើការងារឲ្យទីភ្នាក់ងារ UNRWA នេះដែរ។