ប្រជាជនក្រុង Paiporta ជាក្រុងមួយក្នុងតំបន់ Valencia របស់ប្រទេសអេស្ប៉ាញ បានត្រៀមទប់ទល់ភ្លៀងធ្លាក់ខ្លាំងជុំមួយផ្សេងទៀត និងព្យុះ ដែលមានរយៈពេលត្រឹមតែពីរសប្តាហ៍បន្ទាប់ពីទឹកជំនន់ដ៏គំហុក ធ្វើឱ្យទន្លេពេញហៀរ បណ្តាលឱ្យខូចខាតនៅទូទាំងតំបន់ និងផ្នែកជាច្រើនផ្សេងទៀតរបស់ប្រទេស។ ដូចជាក្រុងរាប់សិបផ្សេងទៀតដែរនៅតំបន់ Valencia ផ្លូវនានានៅទីក្រុង Paiporta នៅតែគ្របដណ្តប់ដោយដីល្បប់ ហើយប្រតិបត្តិការជួយសង្គ្រោះនៅតែបន្ត។

ទីភ្នាក់ងារអាកាសធាតុរបស់ប្រទេសអេស្ប៉ាញ AEMET បានចេញការព្រមានពណ៌ទឹកក្រូចសម្រាប់តំបន់ឆ្នេរភាគខាងត្បូងនៃតំបន់ Valencia ដោយព្យាករណ៍ថានឹងមានភ្លៀងធ្លាក់ចន្លោះពី ៤០ ទៅ ១២០ មីលីម៉ែត្រ។ ដោយកិច្ចខិតខំប្រឹងប្រែងស្តារឡើងវិញកំពុងធ្វើឡើង ភាពមិនប្រាកដប្រជា កើតឡើងជុំវិញផលប៉ះពាល់នៃប្រព័ន្ធព្យុះថ្មី។

ទន្លេ Benamargosa ដែលពេញហៀរ ក្នុងក្រុង Malaga បានហូរនាំរថយន្តរាប់សិបគ្រឿងកាលពីថ្ងៃពុធ ខណៈភ្លៀងធ្លាក់ខ្លាំងបានបង្កការបំផ្លិចបំផ្លាញនៅភាគខាងត្បូង និងភាគខាងកើតប្រទេសអេស្ប៉ាញ។ ទឹកជំនន់ដ៏គំហុក ជំរុញឱ្យទឹកទន្លេហូរហៀរទូទាំងតំបន់បណ្តាលឲ្យមនុស្សជាង២០០នាក់ស្លាប់ និងបំផ្លាញលំនៅឋាន និងទ្រព្យសម្បត្តិអស់ជាច្រើន។

អង្គភាពសេវាសង្គ្រោះបន្ទាន់ក្នុងទីក្រុង Malaga បានជម្លៀសមនុស្ស៣.០០០នាក់ចេញពីលំនៅឋានដែលមានហានិភ័យខ្ពស់នៃទឹកជំនន់នៅជិតទន្លេ Guadalhorce ភាគខាងលិចទីក្រុង ហើយនៅក្នុងតំបន់ផ្សេងៗទៀត បានស្នើឱ្យពលរដ្ឋស្វែងរកទីទួលខ្ពស់ជាងនេះ។

ប្រតិបត្តិករអយស្ម័យយានជាតិ Adif បាននិយាយថា សេវាកម្មរថភ្លើងទាំងអស់នៅក្នុងក្រុង Malaga ត្រូវបានផ្អាក រួមទាំងរថភ្លើងល្បឿនលឿនរវាងទីក្រុង Madrid និងទីក្រុង Malaga ខណៈស្ថានីយ៍រថភ្លើង Malaga បានជម្លៀសអ្នកដំណើរចេញដោយសារតែទឹកជំនន់។