អ្នកតំណាងជាន់ខ្ពស់ មកពីជុំវិញពិភពលោក បានបញ្ចប់កិច្ចប្រជុំរបស់ពួកគេ នៅក្នុងសន្និសីទស្តីពីបម្រែបម្រួលអាកាសធាតុរបស់អង្គការសហប្រជាជាតិ ត្រូវបានគេស្គាល់ថា COP29 ដែលបានធ្វើឡើងនៅក្នុងរដ្ឋធានី Baku ប្រទេសអាស៊ែបៃហ្សង់។

កិច្ចប្រជុំកម្រិតកំពូល កាលពីថ្ងៃអង្គារ និងថ្ងៃពុធ បានប្រមូលផ្តុំមេដឹកនាំ និងអ្នកតំណាងមកពីប្រទេស និងតំបន់ប្រមាណ៨០ប្រទេស។ បញ្ហាសំខាន់លើរបៀបវារៈ គឺការកំណត់គោលដៅថ្មីសម្រាប់ឆ្នាំ ២០២៥ និងការរួមចំណែកផ្នែកហិរញ្ញវត្ថុ ដើម្បីជួយប្រទេសកំពុងអភិវឌ្ឍន៍ប្រយុទ្ធប្រឆាំងការឡើងកម្តៅផែនដីសកល។

មេដឹកនាំជាច្រើន មកពីប្រទេសកោះ បានអំពាវនាវឱ្យមានការបង្កើនផ្នែកហិរញ្ញវត្ថុដ៏សំខាន់។ ប៉ុន្តែសមាជិកសហភាពអឺរ៉ុប និងប្រទេសអភិវឌ្ឍន៍ផ្សេងទៀត បានលើកឡើងពីតម្រូវការដើម្បីពង្រីកមូលដ្ឋានអ្នកផ្តល់ការរួមចំណែក និងបានអំពាវនាវឱ្យប្រទេសដែលមានសេដ្ឋកិច្ចកំពុងរីកចម្រើន ត្រូវចំណាយច្រើនផងដែរ។

ទោះជាយ៉ាងណា ប្រទេសចិន និងប្រទេសមានសេដ្ឋកិច្ចកំពុងរីកចម្រើនផ្សេងទៀត បានទាមទារឲ្យប្រទេសអភិវឌ្ឍន៍នានា បង្កើនការចំណាយជាមុន។ អ្នកចូលរួម ក្នុងសន្និសីទនឹងបន្តការចរចាដើម្បីអនុម័តសេចក្តីប្រកាសលទ្ធផល នៅថ្ងៃទី ២២ ខែវិច្ឆិកា។

អនុរដ្ឋមន្ត្រីទទួលបន្ទុកកិច្ចការបរិស្ថានសកល លោក Matsuzawa Yutaka ជាសមាជិកនៃគណៈប្រតិភូប្រទេសជប៉ុន បាននិយាយថា គម្លាតលើបញ្ហានៃការរួមចំណែកផ្នែកហិរញ្ញវត្ថុ ពុំអាចត្រូវបំពេញបានដោយងាយទេ ហើយលំហូរទឹកប្រាក់សកល ត្រូវតែយកមកពិចារណា។

លោកបាននិយាយថា ការពិភាក្សាលើការប្រើប្រាស់ហិរញ្ញវត្ថុផ្នែកវិស័យឯកជន ត្រូវធ្វើឲ្យស៊ីជម្រៅដើម្បីបង្វែរប្រាក់បន្ថែមទៅកាន់ប្រទេសកំពុងអភិវឌ្ឍន៍។