ភ្នំពេញ៖ ស្ថានភាពទឹកជំនន់ ដែលបង្កមកពីការបើកទឹកពីប្រទេសថៃ ធ្វើឲ្យមានការជន់លិចនៅក្នុងក្រុងប៉ោយប៉ែត ខេត្តបន្ទាយមានជ័យជាថ្មី ដោយគិតត្រឹមព្រឹកថ្ងៃទី២០ ខែតុលា ឆ្នាំ២០២១នេះ នៅមិនទាន់មានការលិចលង់ធ្ងន់ធ្ងរនោះទេ ។
បើតាមអាជ្ញាធរក្រុងប៉ោយប៉ែត បានឲ្យដឹងថា ទឹកជំនន់កំពុងប៉ះពាល់លិចលង់ផ្ទះពលរដ្ឋចំនួន៤ភូមិ ក្នុងក្រុងប៉ោយប៉ែត ហើយអាជ្ញាធរកំពុងត្រៀមលក្ខណៈ ដើម្បីជួយសង្គ្រោះពួកគាត់ទៅកាន់ទីទួលសុវត្ថិភាព ដែលបានរៀបចំរួចរាល់ ។
ប្រភពបានបន្តថា ទឹកជំនន់នេះ កើតឡើងក្រោយពីអាជ្ញាធរថៃ បានបើកមុខទឹកចេញពីប្រទេសរបស់គេ បង្កឱ្យមានទឹកជំនន់ហៀរចូលមកតាមអូរព្រំដែនកម្ពុជាថៃ ហើយបានបង្កឲ្យអ្នកស្រុកនៅក្នុងក្រុងប៉ោយប៉ែត រងគ្រោះដោយសារទឹកជំនន់ទឹកភ្លៀងរបស់ថៃនោះ ។
ពាក់ព័ន្ធបញ្ហាទឹកជំនន់នេះ នៅព្រឹកថ្ងៃទី២០ ខែតុលា ឆ្នាំ២០២១ អាជ្ញាធរក្រុងប៉ោយប៉ែត ដឹកនាំដោយឯកឧត្តម ប៉ាន់ខែម ប៊ុនថន នាយករងខុទ្ទកាល័យ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងលោក គៀត ហ៊ុល អភិបាលក្រុងប៉ោយប៉ែត បានដឹកនាំកម្លាំងចម្រុះប្រមាណជាង៣០០នាក់ បានធ្វើសកម្មភាពចុះតាមអូរព្រំដែនកម្ពុជា-ថៃ ដើម្បីត្រៀមលក្ខណៈជួយជម្លៀសប្រជាពលរដ្ឋ ទៅកាន់ទីទួលសុវត្ថិភាព ។
ដោយនៅថ្ងៃទី២០ ខែតុលានេះ ទឹកបុកខ្លាំងធ្វើឲ្យអាជ្ញាធរមកជួយសង្គ្រោះប្រជាពលរដ្ឋជាបណ្ដើរៗ ឲ្យរួចផុតពីទឹកជំនន់ ដែលកំពុងតែបន្តការលិចលង់ផ្ទះសម្បែង និងទ្រព្យសម្បត្តិរបស់រដ្ឋនាពេលនេះ ។
ក្នុងអំឡុងជួយសង្គ្រោះពលរដ្ឋនោះ លោក គៀត ហ៊ុល អភិបាលក្រុងប៉ោយប៉ែត បានលើកឡើងថា ទឹកជំនន់កំពុងលិចលង់នៅក្នុងក្រុងប៉ោយប៉ែតនេះ មានស្ថានភាពធូរស្រាលជាងឆ្នាំមុន ដោយឆ្នាំកន្លងទៅ ទឹកឡើងមកខ្លាំងធ្វើឲ្យអាជ្ញាធរជួយសង្គ្រោះស្ទើរមិនទាន់ តែពេលនេះពលរដ្ឋ ដែលកំពុងរងគ្រោះតាមអូរព្រំដែននោះ មានសុភាពដូចជាធម្មតា ដែលអាចឲ្យកម្លាំងមកជួយពួកគាត់បានទាន់ពេលវេលា ។
លោកបញ្ជាក់ថា មកដល់ពេលនេះ កម្លាំងអាជ្ញាធរបានជួយពលរដ្ឋបានជាង ៨០គ្រួសារហើយ តែអាជ្ញាធរកំពុងតែត្រៀមអន្តរាគមន៍ បើសិនជាទឹកឡើងមកខ្លាំងដូចឆ្នាំ មុនគឺអាជ្ញាធរនឹងជួយពួកគាត់មកទីទូលសុវត្ថិភាពជាបន្ទាន់ ។
សូមបញ្ជាក់ថា ចាប់ពីថ្ងៃទី១៧ ដល់ថ្ងៃទី២០ ឆ្នាំ២០២១នេះ អាជ្ញាធរខេត្តស្រះកែវ នៃប្រទេសថៃ បានប្រកាសជូនដំណឹងថា ខ្លួននឹងបង្ហៀរទឹកចេញពីមូលដ្ឋាន នៃខេត្តស្រះកែវ ហូរចូលតាមអូរព្រំដែនកម្ពុជា-ថៃ ក្រោយមកគេក៏បានសង្កេតឃើញមានប្រជាពលរដ្ឋចំនួន៤ភូមិ ក្នុងនោះ មានភូមិប៉ោយប៉ែត ភូមិក្បាលកោះ ភូមិអូរជ្រៅ ភូមិគីឡូម៉ែត្រលេខ៤ បានរងគ្រោះជាបណ្ដើរៗ ដោយសារតែជំនន់ទឹកភ្លៀងដែលហូរមកពីប្រទេសថៃនោះ ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
