ប្រព័ន្ធផ្សព្វផ្សាយរដ្ឋ នៅថ្ងៃសុក្រ (ទី១៥ ខែវិច្ឆិកា) នេះ បានរាយការណ៍ថា មេដឹកនាំកូរ៉េខាងជើងលោក Kim Jong Un (គីម ជុង អ៊ុន) បានដឹកនាំការធ្វើតេស្តយានដ្រូនអត្តឃាត និងបញ្ជាឲ្យផលិតអាវុធពីលើអាកាសនេះ ក្នុងចំនួនដ៏ច្រើន ដោយនិយាយថា ការដាក់ឲ្យប្រើប្រាស់យានដ្រូនបែបនេះ នៅជុំវិញពិភពលោកទាមទារឲ្យមានការធ្វើបច្ចុប្បន្នភាពជាបន្ទាន់នៃទ្រឹស្តីយោធា។

គួរបញ្ជាក់ថា លោក គីម ធ្លាប់បានត្រួតមើលការសាកល្បងយានដ្រូនអត្តឃាត កាលពីដើមឆ្នាំនេះ ចំពេលមានការរីកចម្រើនយ៉ាងឆាប់រហ័សនូវកិច្ចសហប្រតិបត្តិការយោធាជាមួយរុស្ស៊ី ដោយបានធ្វើឲ្យមានសំណួរចោទឡើងថា តើលោកកំពុងទទួលបានជំនួយបច្ចេកទេសពីទីក្រុងមូស្គូ ដើម្បីអភិវឌ្ឍយានដ្រូននេះដែរ ឬយ៉ាងណា។

ដោយត្រូវបានគេស្គាល់ផងដែរថា ជាគ្រឿងយុទ្ធោបករណ៍លួចវាយប្រហារ អាវុធបែបនេះត្រូវបានប្រើប្រាស់យ៉ាងទូលំទូលាយក្នុងសង្រ្គាម នៅប្រទេសអ៊ុយក្រែន ក៏ដូចជានៅតំបន់មជ្ឈិមបូព៌ាផងដែរ។ ទីភ្នាក់ងារសារព័ត៌មានរដ្ឋ KCNA បានឲ្យដឹងថា៖ «លោក (Kim) បានគូសបញ្ជាក់អំពីតម្រូវការ ក្នុងការបង្កើតនូវប្រព័ន្ធផលិតកម្មនេះជាបន្តបន្ទាប់ឲ្យបានឆាប់តាមដែលអាចធ្វើទៅបាន និងចូលទៅក្នុងផលិតកម្មក្នុងចំនួនដ៏ច្រើនទ្រង់ទ្រាយ»។

លោក គីម បានលើកឡើងថា ការប្រកួតប្រជែង ក្នុងការប្រើប្រាស់យានដ្រូន សម្រាប់គោលបំណងយោធា កំពុងមានល្បឿនលឿន នៅជុំវិញពិភពលោក ដោយអាជ្ញាធរយោធាទំនងជាទទួលស្គាល់ភាពជោគជ័យរបស់ពួកគេ នៅក្នុងជម្លោះ ក្នុងទំហំផ្សេងៗ។

កូរ៉េខាងជើងបានបញ្ជូនយនដ្រូនឆ្លងកាត់ព្រំដែនទៅកាន់កូរ៉េខាងត្បូង ដោយហោះហើររយៈពេលជាច្រើនម៉ោង នៅក្នុងតំបន់សំខាន់ៗ ក្នុងនោះរួមទាំងរដ្ឋធានីសេអ៊ូល និងនៅលើតំបន់គ្មានការហោះហើរ ជុំវិញការិយាល័យប្រធានាធិបតីកូរ៉េខាងត្បូង។ ការធ្វើបែបនោះបានជំរុញឲ្យកូរ៉េខាងត្បូងដាក់ពង្រាយអាវុធ ដើម្បីបាញ់ទម្លាក់យានដ្រូនរបស់កូរ៉េខាងជើង៕