​បាល់ទាត់៖ ​​ក្រុម​យក្ស​អេ​ស្ប៉ា​ញ Real Madrid ធ្វើដំណើរ​ទៅយក ៣ពិន្ទុ​ពី​ទឹកដី​អ៊ុយ​ក្រែ​ន Shakhtar Donetsk ក្នុង​ជុំ​ទី៣ វគ្គ​វិល​ជុំ​ក្នុង​ពូ​ល D ដោយ​ជ័យជំនះ ៥-០​។ ​គ្រាប់​ដំបូង​របស់ Real Madrid គឺជា​កា​ដូរ​របស់​ម្ចាស់ផ្ទះ Shakhtar ដោយ​គ្រាប់​បាល់​ចូល​ទី​ខ្លួនឯង​របស់ Sergiy Kryvstov នាទី​ទី៣៧ ខណៈ​បួន​គ្រាប់​ផ្សេងទៀត​កើតឡើង​នៅ​វគ្គ​ទី២​។

​​លេង​បាន ៦នាទី​ក្រោយ​ចាប់ផ្តើម​វគ្គ​ទី២ Vinicius Junior រកបាន​ពីរ​គ្រាប់​ម្នាក់ឯង​នៅ​នាទី​ទី៥១ និង ៥៦ មុនពេល​ដែល Rodrygo រកបាន​គ្រាប់​នាំមុខ ៤-០ នៅ​នាទី​ទី៦៤ និង​គ្រាប់​ចុងក្រោយ​ដោយ Karim Benzema នាទី​ទី៩០+១​។ ​ពីរ​គ្រាប់​របស់ Vinicius Junior គឺជា​លើកដំបូង​ដែល​ស៊ុត​បញ្ចូល​ទី​នៅ UEFA Champions League រដូវ​កាល​នេះ និង​គ្រាប់​ទី៧ ក្នុងចំណោម ៩ប្រកួត​ចុងក្រោយ​គ្រប់​ក្របខណ្ឌ​ឱ្យ Real Madrid​។ ​ជ័យជំនះ​នេះ​មានន័យថា Real Madrid ឡើងមក​លេខ២ ក្នុង​ពូ​ល D នេះ​មាន ៦ពិន្ទុ​ស្មើគ្នា​ជាមួយ​ក្រុម​លើ​គេ​ក្នុង​ពូ​ល Sheriff Tiraspol ខណៈ Shakhtar Donetsk ឈរ​ក្រោម​គេ​មាន ១ពិន្ទុ​។

​​ចំណែក​មួយគូ​ទៀត​ក្រុម​ជើងឯក Serie A Inter Milan បានបញ្ចប់​ដំណើរ​ជោគជ័យ​របស់​ក្រុម​បង្ហាញខ្លួន​ថ្មី​របស់ម៉ុ​ល​ដូ​វ៉ា Sheriff Tiraspol ដោយ​ជ័យជំនះ ៣-១​។ ​Edin Dzeko បើក​ការនាំ​មុខមុន​ឱ្យ​ម្ចាស់ផ្ទះ Inter Milan នៅ​នាទី​ទី៣៤ តែ Sheriff ដែល​ឈ្នះ​ពីរ​ប្រកួត​ដំបូង​មកហើយ​នោះ​ក៏​តាម​ស្មើ​វិញ​នៅ​នាទី​ទី៥២ ដោយ Sebastian Thill​។ ​យ៉ាងណាក្តី Arturo Vidal និង Stefan de Virj រកបាន​ម្នាក់​មួយគ្រា​ប់​ឱ្យ Inter Milan នៅ​នាទី​ទី៥៨ និង ៦៧ ធ្វើឱ្យ Inter Milan រកបាន​ជ័យជំនះ​ដំបូង​ក្នុង​ពូ​ល D នេះ​ឡើងមក​លេខ៣ មាន ៤ពិន្ទុ​៕

​អត្ថបទ​៖​នាង សុភា​វុ​ធ