ប្រធានាធិបតីសហរដ្ឋអាមេរិលលោក Joe Biden ធ្វើដំណើរទៅកាន់ទីក្រុង Lima ប្រទេសប៉េរូ កាលពីថ្ងៃព្រហស្បតិ៍ សម្រាប់ការលាគ្នាជាលើកចុងក្រោយជាមួយក្រុមមេដឹកនាំពិភពលោក ក្រោយរយៈពេលជាង ៥០ឆ្នាំនៅក្នុងឆាកនយោបាយសហរដ្ឋអាមេរិក ប៉ុន្តែបុរសម្នាក់ដែលគាត់ព្យាយាម តែពុំបានសម្រេចក្នុងការវិលត្រឡប់មកកាន់អំណាចវិញនោះគឺលោកប្រធានាធិបតីជិតចូលកាន់អំណាច Donald Trump ទំនងជាផ្តោតសំខាន់លើជំនួបជាច្រើន ។

លោក Bidenនឹងមានជំនួបឯកជនជាមួយប្រធានាធិបតីចិនលោក Xi Jinping និងប្រមុខរដ្ឋមកពីជប៉ុន កូរ៉េខាងត្បូង និងប្រេស៊ីល អំឡុងជំនួបកំពូលនៃវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក(APEC) នៅក្នុងប្រទេសប៉េរូ និងកិច្ចប្រជុំកំពូលប្រទេសមានឧស្សាហកម្មរីកលូតលាស់ G20 នៅក្នុងប្រទេសប្រេស៊ីល ។

មន្រ្តីជាន់ខ្ពស់មួយរូបរបស់រដ្ឋបាលលោក Bidenនិយាយថា ជំនួបកំពូលរយៈពេល ៦ថ្ងៃនេះ ពុំត្រូវបានគេរំពឹងថានឹងផ្តល់ជាកិច្ចព្រមព្រៀងថ្មីសំខាន់ៗណាមួយនោះឡើយ បើទោះបីជាពួកគេផ្តោតសំខាន់លើបញ្ហាពាណិជ្ជកម្ម សន្តិសុខ និងសម្ព័ន្ធមិត្តសកលក៏ដោយ ។

គួរឲ្យដឹងថា លោក Trump បានផ្តួលលោកស្រីអនុប្រធានាធិបតី Kamala Harris គឺជាបេក្ខជនមកពីគណបក្សប្រជាធិបតេយ្យនៅការបោះឆ្នោតជ្រើសរើសប្រធានាធិបតីកាលពីថ្ងៃទី ៥ ខែវិច្ឆិកា កន្លងទៅ ក្រោយរូបលោកសន្យាចំពោះពលរដ្ឋអាមេរិកថា លោកនឹងដំឡើងពន្ធលើការនាំចូលទាំងអស់ ក្នុងនោះការដំឡើងពន្ធខ្ពស់ជាងគេលើទំនិញចិន ហើយនិងបង្ហាញសញ្ញាបន្ធូរបន្ថយការគាំទ្ររអ៊ុយក្រែន នៅក្នុងសង្រ្គាមជាមួយរុស្ស៊ី ។

ដោយឡែក លោក Biden ដែលបានឡើងកាន់អំណាចកាលពីឆ្នាំ ២០២០ បានព្យាយាមបង្កើតឡើងវិញនូវសម្ព័ន្ធភាពដែលបានជាប់គាំង អំឡុងអាណត្តិដំបូងរបស់លោក Trump និងព្យាយាបង្ហាញពិភពលោកថា សហរដ្ឋអាមេរិកនៅតែរក្សាការចូលរួមនៅឯនាយព្រំដែនរបស់ខ្លួន ។ លោកបានពង្រឹង និងបង្កើនកម្លាំងអង្គការណាតូ ហើយនិងធ្វើការប្រឆាំងជាមួយចិននៅតំបន់ឥណ្ឌូ-ប៉ាស៊ីហ្វិក តាមរយៈការបង្កើតសម្ព័ន្ធភាពពហុភាគីនៅអាស៊ី ៕