ទីក្រុង Lahore ដែលជាទីក្រុងធំបំផុតទី ២របស់ប៉ាគីស្ថាន បន្តហ៊ុព័ទ្ធដោយដោយផ្សែងអ័ព្ទពុលយ៉ាងក្រាស់កាលពីថ្ងៃព្រហស្បតិ៍ បង្កឲ្យមានហានិភ័យសុខភាពធ្ងន់ធ្ងរដល់ប្រជាពលរដ្ឋរបស់ពួកគេ ។

វិបត្តិផ្សែងអ័ព្ទឥតស្រាកស្រាន្ត បណ្តាលមកពីការបំភាយឧស្ម័នរថយន្ត កង្វក់ខ្យល់បណ្តាលមកពីឧស្សាហកម្ម និងការដុតកាកសំណល់កសិកម្ម បានធ្វើឲ្យប៉ះពាល់យ៉ាងខ្លាំងដល់សុខភាព និងការរស់នៅរបស់ប្រជាពលរដ្ឋរាប់លាននាក់ បង្ខំឲ្យមានការអំពាវនាវបន្ទាន់ឲ្យរដ្ឋាភិបាលចាត់វិធានការភ្លាមៗ ដើម្បីកាត់បន្ថយកង្វក់បរិយាកាស និងការពារសុខុមាលភាពរបស់ប្រជាពលរដ្ឋ ។

លោក Abdullah Fadil គឺជាអ្នកតំណាងមូលនិធិកុមារអន្តរជាតិ UNICEF បាននិយាយថា កុមារជាង ១១លាននាក់ ក្រោមអាយុ ៥ឆ្នាំ ស្ថិតក្នុងគ្រោះថ្នាក់ ។

លោកបានបង្ហាញក្តីបារម្ភផងដែរចំពោះការបិទសាលារៀន ធ្វើឲ្យអាក់ខានដល់ការសិក្សារបស់សិស្ស ហើយលោកនិយាយថា សាលារៀនភាគច្រើនពុំបានតម្រូវឲ្យមានការសិក្សាតាមអនឡាញនោះទេ ។

គុណភាពខ្យល់នៅក្នុងទីក្រុង Lahoreដែលជារដ្ឋធានីរបស់ខេត្ត Punjab កាន់តែធ្ងន់ធ្ងរខ្លាំងពីមួយថ្ងៃទៅមួយថ្ងៃ ដែលបច្ចុប្បន្នក្លាយជាទីក្រុងកង្វក់បរិយាកាសដ៏អាក្រក់បំផុតនៅលើពិភពលោក ។

ក្រុមគុណភាពខ្យល់ស្វីស IQAir បានចាត់ថ្នាក់គុណភាពខ្យល់របស់ទីក្រុងមួយនេះ ថាគ្រោះថ្នាក់ខ្លាំងជាមួយកម្រិត AQI ចំនួន ១៥៨១ អំឡុងពេលថ្ងៃ និងកម្រិត ១២៣៦ អំឡុងពេលល្ងាច កាលពីថ្ងៃព្រហស្បតិ៍ ។

ខេត្ត Punjab បានដាក់ការស្តីបន្ទោសកង្វក់បរិយាកាសនេះលើកង្វក់ខ្យល់ចេញពីប្រទេសឥណ្ឌា ជាទីដែលតំបន់ភាគខាងជើងរបស់ពួកគេ កំពុងជួបគុណភាពខ្យល់ដ៏គ្រោះថ្នាក់ខ្លាំងផងដែរ ។

តំបន់ជាច្រើននៅក្នុងប្រទេសអាស៊ីខាងត្បូងមួយនេះ ហ៊ុព័ទ្ធដោយផ្សែងអ័ព្ទពុលរាល់រដូវរងា ពេលដែលខ្យល់ត្រជាក់ទាក់ជាប់ធូលី ការបំភាយឧស្ម័ន និងផ្សែងចេញពីការដុតកាកសំណល់កសិដ្ឋាន ៕