សមាជិកជាន់ខ្ពស់នៃគណៈរដ្ឋមន្ត្រីសន្តិសុខរបស់អ៊ីស្រាអែល បាននិយាយថា អ៊ីស្រាអែលរំពឹងថា រដ្ឋបាល លោក Donald Trump នាពេលខាងមុខ នឹងប្រកាន់ជំហរយ៉ាងតឹងរ៉ឹង ចំពោះអ៊ីរ៉ង់ និងមហិច្ឆតាធ្វើអាវុធនុយក្លេអ៊ែររបស់ប្រទេសនេះ ដែលនឹងបង្កើតឱកាស ដើម្បីឲ្យមានកិច្ចព្រមព្រៀងសន្តិភាពបន្ថែមទៀតជាមួយប្រទេសជិតខាងអារ៉ាប់។

ហើយជាមួយគ្នានេះ នៅក្នុងបទសម្ភាសន៍ជាមួយសារព័ត៌មាន Reuters រដ្ឋមន្ត្រីថាមពល លោក Eli Cohen ក៏បានប្រាប់ផងដែរថា ប្រទេសអ៊ីស្រាអែលកាន់តែខិតជិតនឹងការឈានដល់កិច្ចព្រមព្រៀងមួយ ដើម្បីបញ្ចប់ការប្រយុទ្ធគ្នា នៅក្នុងប្រទេសលីបង់ ហើយរុញក្រុមហេសបូឡាគាំទ្រដោយអ៊ីរ៉ង់ឲ្យនៅឆ្ងាយពីព្រំដែន ខណៈដែលទទូចថា អ៊ីស្រាអែលរក្សាសិទ្ធិធ្វើសកម្មភាពយោធា ប្រសិនបើខ្លួនត្រូវបានរំលោភបំពាន។

គួរបញ្ជាក់ថា អ៊ីស្រាអែលបានជាប់ក្នុងសង្រ្គាមពហុសមរភូមិ ចាប់តាំងពីក្រុមហាម៉ាសដែលត្រូវបានគាំទ្រដោយអ៊ីរ៉ង់ បានបើកការវាយលុកពីតំបន់ហ្កាហ្សាមកលើអ៊ីស្រាអែលភាគខាងត្បូង កាលពីថ្ងៃទី៧ ខែតុលា ឆ្នាំ២០២៣។ ហើយក្រុមហេសបូឡាបានចាប់ផ្តើមវាយប្រហារនៅថ្ងៃបន្ទាប់។ អ៊ីស្រាអែលបានចាប់ផ្តើមយុទ្ធនាការវាយប្រហារតាមផ្លូវអាកាស និងផ្លូវគោក នៅតំបន់ហ្កាហ្សា ហើយក្នុងប៉ុន្មានខែថ្មីៗនេះ បានបង្កើនប្រតិបត្តិការរបស់ខ្លួន នៅភាគខាងត្បូងប្រទេសលីបង់។

លោក Cohen បានលើកឡើងថា ប្រធានាធិបតីអាមេរិកនាពេលខាងមុខ គឺលោក Trump បាន និងកំពុងតែងតាំងបុគ្គលិកជាន់ខ្ពស់ដែល «ប្រាកដណាស់ គាំទ្រដល់វិធានការដែលត្រូវបានកំណត់ ចំពោះអ៊ីរ៉ង់»។

អំឡុងពេលធ្វើយុទ្ធនាការរបស់លោក លោក Trump បាននិយាយថា គោលនយោបាយរបស់លោកប្រធានាធិបតី Joe Biden ដែលមិនអនុវត្តទណ្ឌកម្មនាំចេញប្រេងយ៉ាងតឹងរ៉ឹង បានធ្វើឲ្យទីក្រុងវ៉ាស៊ីនតោនចុះខ្សោយ និងបានជួយពង្រឹងទីក្រុងតេអេរ៉ង់ ដោយអនុញ្ញាតឲ្យប្រទេសនេះលក់ប្រេង ប្រមូលប្រាក់ និងពង្រីកការស្វែងរកនុយក្លេអ៊ែរ និងឥទ្ធិពលតាមរយៈកងជីវពលប្រដាប់អាវុធ៕