ធនាគារពិភពលោក កាលពីថ្ងៃព្រហស្បតិ៍ (ទី១៤ ខែវិច្ឆិកា) បាននិយាយថា ជម្លោះដែលកំពុងមាន រវាងអ៊ីស្រាអែល និងក្រុមហេសបូឡា បានបណ្តាលឲ្យមានការខូចខាត និងការខាតបង់ជាទឹកប្រាក់ចំនួន ៨,៥ពាន់លានដុល្លារដល់ប្រទេសលីបង់ ដោយតួលេខចុងក្រោយត្រូវបានគេរំពឹងថា នឹងកើនឡើងខ្ពស់ នៅពេលដែលជម្លោះនេះនៅតែបន្តទៅមុខឥតថមថយ។

ដោយត្រូវបានបញ្ឆេះដោយភ្លើងសង្រ្គាម នៅតំបន់ហ្កាហ្សា ជម្លោះបាន និងកំពុងផ្ទុះឡើងជិត ១ឆ្នាំ មុនពេលដែលអ៊ីស្រាអែល បានបន្តការវាយលុក ក្នុងខែកញ្ញា ដោយបានសន្ធាប់លើប្រទេសលីបង់ដោយការវាយប្រហារតាមអាកាស និងបញ្ជូនកងទ័ពចូលទៅភាគខាងត្បូង។

បើតាមការប៉ាន់ប្រមាណ លីបង់ប្រឈមនឹងការខាតបង់សេដ្ឋកិច្ច ៥,១ពាន់លានដុល្លារ ក្នុងរយៈពេល ១២ខែ ដោយភាគច្រើនបំផុតដោយសារផលប៉ះពាល់យ៉ាងធ្ងន់ធ្ងរ លើពាណិជ្ជកម្ម ទេសចរណ៍ និងកសិកម្ម។ ហើយការវាយតម្លៃការខូចខាត និងការបាត់បង់ដែលធ្វើឡើងដោយធនាគារពិភពលោក បានឲ្យដឹងថា ការខូចខាតជាក់ស្ដែងដោយផ្ទាល់ នៅលីបង់ មានចំនួនយ៉ាងហោចណាស់ ៣,៤ពាន់លានដុល្លារ។

ការវិភាគបានព្យាករថា GDP (ផលិតផលក្នុងស្រុកសរុប) ជាក់ស្ដែងរបស់ប្រទេសលីបង់ នឹងធ្លាក់ចុះយ៉ាងតិច ៥,៧ភាគរយ នៅឆ្នាំ២០២៤ ដោយសារជម្លោះនេះ បើប្រៀបធៀបទៅនឹងកំណើន ០,៩ភាគរយ នៅក្នុងសេណារីយោគ្មានជម្លោះ ជាចំនួនដ៏ខ្ពស់ សម្រាប់ប្រទេសមួយ ដែលនៅតែមិនទាន់មានភាពនឹងន ដោយសារផលប៉ះពាល់នៃការដួលរលំហិរញ្ញវត្ថុរយៈពេល ៥ឆ្នាំកន្លងទៅ៕