អគ្គរដ្ឋអាជ្ញារបស់ប្រទេសអ៊ីស្រាអែល កាលពីថ្ងៃព្រហស្បតិ៍ (ទី១៤ ខែវិច្ឆិកា) បានប្រាប់នាយករដ្ឋមន្ត្រី លោក Benjamin Netanyahu ឲ្យវាយតម្លៃឡើងវិញនូវតួនាទីរបស់រដ្ឋមន្ត្រីសន្តិសុខជាតិខាងស្តាំនិយមរបស់លោក គឺលោក Itamar Ben-Gvir ដោយលើកឡើងពីការជ្រៀតជ្រែក នៅក្នុងកិច្ចការនគរបាល។

អគ្គរដ្ឋអាជ្ញា លោកស្រី Gali Baharav-Miara បានផ្ញើលិខិតមួយច្បាប់ទៅលោក Netanyahu ដែលលោកស្រីបានពិពណ៌នាអំពីករណី នៅពេលដែលលោក Ben-Gvir ដែលទទួលបន្ទុកផ្នែកកំណត់គោលនយោបាយទូទៅ ទំនងជាបានផ្តល់ការណែនាំប្រតិបត្តិការដែលគំរាមកំហែងដល់ស្ថានភាពនយោបាយរបស់នគរបាល។

នៅក្នុងសេចក្តីថ្លែងការណ៍មួយ លោកស្រី Baharav-Miara បានលើកឡើងថា៖ «បើតាមការអះអាង ការរួមបញ្ចូលគ្នានៃអន្តរាគមន៍មិនត្រឹមត្រូវ នៅក្នុងសកម្មភាពរបស់នគរបាល និងការពឹងផ្អែករបស់មន្រ្តីនគរបាលលើរដ្ឋមន្រ្តីរូបនេះ ដើម្បីទទួលបានដំឡើងឋានន្តរសក្ដិរបស់ពួកគេ ធ្វើឲ្យប៉ះពាល់ដល់លទ្ធភាពនៃការធានាថា នគរបាលនឹងធ្វើសកម្មភាពដោយស្មោះត្រង់ ចំពោះសាធារណជន និងមិនផ្អៀងទៅផ្នែកនយោបាយ»។

ពាក់ព័ន្ធនឹងការលើកឡើងនេះ មិនទាន់មានការអត្ថាធិប្បាយភ្លាមៗនៅឡើយទេ ពីការិយាល័យរបស់លោក Netanyahu៕