លោក Elon Musk ទីប្រឹក្សាជិតស្និទ្ធរបស់ប្រធានាធិបតីជាប់ឆ្នោត លោក Donald Trump បានជួបឯកអគ្គរដ្ឋទូតអ៊ីរ៉ង់ ប្រចាំនៅអង្គការសហប្រជាជាតិ (UN) កាលពីថ្ងៃទី១១ ខែវិច្ឆិកា នៅទីក្រុង New York ជាជំនួបដែលមន្ត្រីអ៊ីរ៉ង់ ២រូប បានពណ៌នាថា ជាការពិភាក្សា អំពីវិធីកាត់បន្ថយភាពតានតឹង រវាងអ៊ីរ៉ង់ និងសហរដ្ឋអាមេរិក។

មន្ត្រីអ៊ីរ៉ង់ទាំង ២រូបនោះ បាននិយាយថា ជំនួប រវាងលោក Musk និងឯកអគ្គរដ្ឋទូត លោក Amir Saeid Iravani មានរយៈពេលជាង ១ម៉ោង ហើយបានធ្វើឡើង នៅទីកន្លែងសម្ងាត់មួយ។ ដោយនិយាយក្នុងលក្ខខណ្ឌមិនបញ្ចេញឈ្មោះដោយសារតែពួកគេមិនត្រូវបានអនុញ្ញាតឲ្យជជែក អំពីគោលនយោបាយនេះជាសាធារណៈ មន្ត្រីទាំងនោះ បានពណ៌នាកិច្ចប្រជុំនេះថា ជា «សញ្ញាវិជ្ជមាន» និង «ដំណឹងល្អ»។

នៅពេលត្រូវបានសួរថា តើមានការជួបគ្នាបែបនេះដែរ ឬអត់នោះ លោក Steven Cheung នាយកផ្នែកទំនាក់ទំនងរបស់លោក Trump បាននិយាយថា៖ «យើងមិនធ្វើអត្ថាធិប្បាយ ជុំវិញរបាយការណ៍នៃកិច្ចប្រជុំឯកជនដែលបានកើតឡើង ឬមិនបានកើតឡើងនោះទេ»។ ចំណែកលោក Musk មិនបានឆ្លើយតបទៅនឹងសំណើសុំការអត្ថាធិប្បាយនោះឡើយ។

គួរបញ្ជាក់ថា លោក Musk បានលេចមុខឡើង ក្នុងនាមជាពលរដ្ឋគ្មានមុខងារសាធារណៈដ៏មានឥទ្ធិពលបំផុត នៅក្នុងដំណើរការផ្ទេរអំណាចរបស់លោក Trump ហើយបានមានវត្តមាននៅក្នុងការសម្ភាសន៍ការងារស្ទើរតែទាំងអស់។ អំឡុងការសន្ទនាតាមទូរសព្ទ កាលពីសប្តាហ៍មុន ជាមួយប្រធានាធិបតីអ៊ុយក្រែន លោក Volodymyr Zelensky លោកប្រធានាធិបតីជាប់ឆ្នោត បានហុចទូរសព្ទទៅមហាសេដ្ឋីរូបនេះ។ លោក Musk បានដើរតួយ៉ាងសំខាន់ ក្នុងការផ្តល់សមត្ថភាពទំនាក់ទំនងដល់អ៊ុយក្រែន អំឡុងពេលមានសង្គ្រាមជាមួយរុស្ស៊ី៕