​បាល់ទាត់៖ ​ក្រុមបាល់ទាត់​អារ៉ាប៊ីសាអ៊ូឌីត Al Hilal បាន​ឈានឡើង​វគ្គ​ផ្តាច់ព្រ័ត្រ​ក្រប​ខណ្ឌ​ក្លិប​កំពូល​អាស៊ី AFC Champions League ជា​លើក​ទី​៣ ក្នុង​រយៈពេល ៥​ឆ្នាំ​ចុងក្រោយ​បន្ទាប់ពី​យកឈ្នះ​ក្រុម​រួម​លី​គ Al Nassr ២-១​។ ​​ជំនួប​ក្រុម​ទាំងពីរ​ធ្វើឡើង​នៅ​កីឡដ្ឋាន Mrsool Park ទីក្រុង Riyadh ប្រទេស​អារ៉ាប៊ីសាអ៊ូឌីត​យប់​ថ្ងៃ​អង្គារ​ម្សិលមិញ​ដែលជា​ជំនួប Riyadh Derby​។

​​Moussa Marega បើក​ការនាំ​មុខមុន​ឱ្យ Al Hilal នៅ​នាទី​ទី១៧ ដែលជា​គ្រាប់​ដំបូង​របស់គេ​នៅ AFC Champions League មុនពេល​ដែល Al Nassr កាន់តែ​យ៉ាប់យ៉ឺន​នៅពេល Ali Al Lajami ត្រូវបាន​បណ្តេញ​ចេញពី​ការប្រកួត​ក្រោយ​កំហុស​លើ Marega នៅ​ចុង​វគ្គ​ទី១​។ ​​ទោះបី​ជាមាន​គ្នា​តិចជាង​ក៏ពិតមែន Al Nassr ក៏​នៅតែ​អាច​រកបាន​គ្រាប់​តាម​ស្មើ​វិញ​នៅ​វគ្គ​ទី២ នាទី​ទី៥០ ដោយ​ការ​តែ​ត​បញ្ចូល​ទី​របស់ Anderson Talisco​។ ​​យ៉ាងណាក្តី Al Hilal នៅតែមាន​ប្រៀប​ និង​រកបាន​គ្រាប់​ជ័យជំនះ​នៅ​នាទី​ទី៧១ ដោយ Salem Al-Dawsari​។​​ ​ជ័យ​ជំនះ​នេះ​ធ្វើឱ្យ Al Hilal ឡើងទៅ​អង្គុយចាំ​នៅ​វគ្គ​ផ្តាច់ព្រ័ត្រ​មុន​ រង់ចាំ​ជួប​ជាមួយ​ក្រុម​ឈ្នះ​រវាង​ក្រុម​កូរ៉េខាងត្បូង​ទាំងពីរ Pohang Steeler និង Ulsan Hyundai ដែល​ជួបគ្នា​យប់​នេះ​។​ ​​រំលឹកថា Al Hilal បាន​ឡើង​វគ្គ​ផ្តាច់ព្រ័ត្រ ៣លើក​រួចមកហើយ​រាប់​ពី​ឆ្នាំ២០១៧ តែ​ចាញ់​នៅ Urawa Red នៅ​វគ្គ​ផ្តាច់ព្រ័ត្រ និង​ឆ្នាំ២០១៩ ជា​ជើងឯក​ក្រោយ​សងសឹក Urawa Red របស់​ជប៉ុន​បានសំរេច​៕

​អត្ថបទ​៖​នាង សុភា​វុ​ធ