រដ្ឋបាលក្នុងតំបន់ Aragon បានឲ្យដឹងថា អគ្គិភ័យបានឆាបឆេះផ្ទះអ្នកចូលនិវត្តន៍មួយកន្លែង នៅទីក្រុង Villafranca de Ebro ភាគខាងជើងប្រទេសអេស្ប៉ាញ កាលពីព្រឹកព្រលឹមថ្ងៃសុក្រ (ទី១៥ ខែវិច្ឆិកា) នេះ ដោយបានសម្លាប់មនុស្សយ៉ាងហោចណាស់ ១០នាក់។

អ្នកនាំពាក្យរបស់រដ្ឋបាល ក្នុងតំបន់ បានប្រាប់ថា អគ្គិភ័យនេះបានចាប់ផ្តើមកើតឡើងនៅក្នុងលំនៅឋាន សម្រាប់មនុស្សចាស់ឈ្មោះ Jardines de Villafranca នៅវេលាម៉ោងប្រហែល ៥ព្រឹក ម៉ោងក្នុងស្រុក ហើយក្រុមពន្លត់អគ្គិភ័យ បានចំណាយពេល ២-៣ម៉ោង ទើបអាចពន្លត់អណ្ដាតភ្លើងបាន។

យ៉ាងណាក្ដី អ្នកនាំពាក្យរូបនោះ មិនអាចបញ្ជាក់បានថា តើជនរងគ្រោះទាំងអស់ សុទ្ធតែជាអ្នករស់នៅក្នុងផ្ទះអ្នកចូលនិវត្តន៍ ដែលមានមនុស្សចាស់ចំនួន ៨២នាក់នោះ ដែរ ឬយ៉ាងណា។ តែលោកបានបន្ថែមថា មនុស្សម្នាក់ស្ថិតក្នុងស្ថានភាពធ្ងន់ធ្ងរ ខណៈមនុស្សមួយចំនួនស្ថិតក្រោមការមើលថែ ដែលភាគច្រើនប៉ះពាល់ដោយការស្រូបផ្សែងចូលខ្លួន។

លោកបានឲ្យដឹងទៀតថា អ្នកពន្លត់អគ្គិភ័យដែលមកពីតំបន់ Zaragoza ជាទីក្រុងនៅចម្ងាយ ៣៥គីឡូម៉ែត្រ រថយន្តសង្គ្រោះបន្ទាន់ និងនគរបាល កំពុងស្ថិតនៅកន្លែងកើតហេតុ។ មូលហេតុនៃការឆេះនេះ កំពុងស្ថិតក្រោមការស៊ើបអង្កេត៕