​បាល់ទាត់៖ ​អ្នកចាត់ការ​ក្រុមបាល់ទាត់​បុរស​ជំរើសជាតិ​ទាំងអស់ នឹង​ត្រូវ​អនុញ្ញាត​ឱ្យ​ជួប​ជាមួយ​លោក Arsene Wenger ពី​គោល​គំនិត​បែបណា​ចំពោះ​គំរោង​របស់ FIFA ដែល​ចង់​រៀបចំ​ឱ្យមាន​ព្រឹត្តិការណ៍​បាល់ទាត់​ពិភពលោក​ជា​រៀងរាល់​ ២​ឆ្នាំ​ម្តង​។ ​​លោក Arsene Wenger គឺជា​ប្រធាន​ផ្នែក​អភិវឌ្ឍ​បាល់ទាត់​របស់ FIFA នឹង​ចាប់ផ្តើម​ជួប​ជាមួយ​អ្នកចាត់ការ​តាម​បណ្តា​ក្រុម​ជំរើសជាតិ​ទាំងអស់​ ចាប់ពី​ថ្ងៃ​អង្គារ​ដល់​ថ្ងៃ​ព្រហស្បតិ៍​។

​​អតីត​អ្នកចាត់ការ​ការ​ក្រុម​កាំភ្លើង Arsenal រូបនេះ​បាន​ជួប​ជាមួយ​មនុស្ស​ជាច្រើន​រួចមកហើយ​ក្នុង​កិច្ចពិភាក្សា​ជុំវិញ​គំរោង World Cup ពីរ​ឆ្នាំ​ម្តងនេះ ក៏ដូចជា​ការកែប្រែ​កាលវិភាគ​ប្រកួត​លក្ខណៈ​អន្តរជាតិ​ចាប់ពី​ឆ្នាំ២០២៤ តទៅ​។ ​កន្លងមក​មាន UEFA និង​សមាគម​ក្លិប​បាល់ទាត់​អឺរ៉ុប ECA សុទ្ធតែ​បាន​បដិសេធ​មិន​គាំទ្រ​គំរោង​នេះ​។ ​ជាមួយគ្នា​នោះដែរ គណៈកម្មាធិការ​អូឡាំពិក​អន្តរជាតិ IOC ក៏បាន​បង្ហាញ​ក្តីបារម្ភ​របស់ខ្លួន​ផងដែរ​ដោយ​កា​រៀបចំ World Cup ពីរ​ឆ្នាំ​ម្តង​នឹង​ផ្តល់​ផលប៉ះពាល់​ដល់​កីឡា​ដទៃទៀត និង​ទាមទារ​ឱ្យមាន​ការជជែក ពិភាក្សា​ប្រើពេល​វេលា​ច្រើន​បន្ថែមទៀត​។

​​ចំណែក FIFA បាន​លើកឡើងថា ការរៀបចំ​ឱ្យ World Cup ពីរ​ឆ្នាំ​ម្តង​នឹង​បង្កើន​ឱ្យ​ក្រុមបាល់ទាត់​ជំរើសជាតិ​ដទៃទៀត​ មានឱកាស​បង្ហាញខ្លួន​នៅ​ព្រឹត្តិការណ៍​នេះ កាត់បន្ថយ​ការប្រកួត​ជំ​រុះ និងកាត់បន្ថយ​ការប្រកួត​មិត្តភាព​អន្តរជាតិ ក៏ដូចជា​កាត់បន្ថយ​ការធ្វើដំណើរ​របស់​កីឡាករ​។ ​UEFA ធ្លាប់បាន​បដិសេធ​ និង​បញ្ចេញយោបល់​មុនគេ​ថា ការរៀបចំ World Cup ពីរ​ឆ្នាំ​ម្តង​នឹង​ធ្វើឱ្យ​បាត់បង់​តំលៃ​នៃ​ព្រឹត្តិការណ៍​៕

​អត្ថបទ​៖​នាង សុភា​វុ​ធ