ស្វាយរៀង៖ ថ្ងៃ​ទី​២០ ខែ​តុលា ឆ្នាំ​២០២១ ក្នុង​នាមលោកជំទាវ​កិត្តិ​សង្គហ​បណ្ឌិត ម៉ែន សំអន ឧបនាយករដ្ឋមន្ត្រី​រដ្ឋមន្ត្រី​ក្រសួង​ទំនាក់ទំនង​ជាមួយ​រដ្ឋសភា​-ព្រឹទ្ធសភា និង​អធិការកិច្ច និង​ជា​ប្រធាន​ក្រុម​ការងារ​រាជ​រដ្ឋាភិបាល​ចុះ​មូលដ្ឋាន​ខេត្ត​ស្វាយរៀង​ ឯកឧត្ដម​ទេសរដ្ឋមន្ត្រី លី ធុជ ប្រធាន​ក្រុម​ការងារ​រាជ​រដ្ឋាភិបាល ចុះ​មូលដ្ឋាន​ក្រុង​បាវិត បាន​ចុះ​ជួប​សំណេះសំណាល​ជាមួយ​ក្រុមប្រឹក្សា​សង្កាត់​ប្រាសាទ ព្រមទាំង​នាំ​យកនូវ​​គ្រឿង ឧបភោគ​បរិភោគ និង​ថវិកា​មួយ​ចំនួន ដែល​ជា​អំណោយ​ដ៏​ថ្លៃថ្លា​របស់​សម្តេច​តេជោ​ ចែក​ជូន​ប្រជាពលរដ្ឋ​ក្រីក្រ និង​ចាស់​ជរា​ចំនួន ១៥​គ្រួសារ​។

ក្នុងឱកាស​នោះ ឯកឧត្ដមទេសរដ្ឋមន្ត្រី បាន​ពាំនាំ​សេចក្ដី​នឹក​រលឹក និង​សាកសួរ​សុខទុក្ខ​ពី​សម្តេច​តេជោ នាយក​រដ្ឋមន្ត្រី​​ ក៏​ដូច​ជា​លោក​ស្រី​កិត្តិ​សង្គហ​បណ្ឌិត​ឧបនាយករដ្ឋមន្ត្រី ​ជូន​ចំពោះ​បងប្អូន​ប្រជាពលរដ្ឋ​ក្រុង​បាវិត ខេត្ត​ស្វាយរៀង ព្រមទាំង​បាន​អំពាវនាវ ឲ្យប្រជាពលរដ្ឋ​ទាំង​អស់​ទៅ​ពិនិត្យ​ឈ្មោះ​បោះ​ឆ្នោត​ចុះ​ឈ្មោះ បោះ​ឆ្នោត និង​បោះឆ្នោត​ជូន​គណបក្ស​ប្រជាជន​កម្ពុជា​។ ​

លោកបញ្ជាក់​បន្ថែ​ម​ទៀត​ថា គាំទ្រ​គណបក្ស​ប្រជាជន​កម្ពុជា​ គឺ​គាំទ្រ​សម្តេច​តេជោ ធ្វើ​ជា​នាយករដ្ឋមន្ត្រី ហើយ បោះឆ្នោត​ជូន​គណបក្ស​ប្រជាជន​កម្ពុជា គឺ​បោះឆ្នោត​ដើម្បី​បន្ត​ទទួល​បាន​សេវា​ថែទាំ​សុខមាលភាព និង​បន្ត ស្តារសេដ្ឋកិច្ចឡើងវិញ​ ​ក្រោយ​ពីមានការរីក​រាតត្បាត​ជំងឺ​ឆ្លង​កូវីដ​-១៩​៕