កាលពីថ្ងៃសៅរ៍ម្សិលមិញ ប្រធានាធិបតីចិនលោក Xi Jinping បានសន្យាធ្វើការជាមួយរដ្ឋបាលជិតកាន់អំណាចសហរដ្ឋអាមេរិករបស់លោកប្រធានាធិបតីជាប់ឆ្នោត Donald Trump ពេលដែលរូបលោកមានជំនួបជាលើកចុងក្រោយជាមួយលោកប្រធានាធិបតីជិតចាកចេញពីតំណែង Joe Biden ដើម្បីពិភាក្សាលើជម្លោះសំខាន់ៗ ចាប់ពីឧក្រិដ្ឋកម្មវាយប្រហារតាមប្រព័ន្ធអ៊ីនធឺណិត រហូតដល់បញ្ហាពាណិជ្ជកម្ម បញ្ហាកោះតៃវ៉ាន់ និងបញ្ហារុស្ស៊ី ។

 លោក Biden បានជួបជាមួយលោក Xi រយៈពេលប្រហែល ២ម៉ោង នៅសណ្ឋាគាដែលមេដឹកនាំចិនរូបនេះស្នាក់នៅ នៅក្រៅកិច្ចប្រជុំកំពូលវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ស្ថិតក្នុងទីក្រុង Limaរបស់ប្រទេសប៉េរូ និងជាកិច្ចប្រជុំលើកដំបូងរបស់ពួកគេ ក្នុងរយៈពេល ៧ខែកន្លងមកនេះ ។

 លោក Xiនិយាយថា គោលដៅរបស់ចិនឲ្យមានទំនាក់ទំនងចិន-សហរដ្ឋអាមេរិកប្រកបដោយស្ថិរភាព សុខភាព និងចីរភាព ពុំផ្លាស់ប្តូរនោះទេ បន្ទាប់ពីការបោះឆ្នោត ហើយចិនត្រៀមខ្លួនធ្វើការជាមួយរដ្ឋបាលថ្មីសហរដ្ឋអាមេរិក ដើម្បីរក្សាការទំនាក់ទំនង ពង្រីកកិច្ចសហប្រតិបត្តិការ និងគ្រប់គ្រងការខ្វែងគំនិតគ្នា ។

 លោក Bidenនិយាយប្រាប់លោក Xiថា មេដឹកនាំទាំង ២ តែងតែពុំឯកភាពគ្នានោះទេ ប៉ុន្តែកិច្ចពិភាក្សារបស់ពួកគេ គឺស្មោះត្រង់ និងឥតងាករេ ។

 កិច្ចពិភាក្សានេះដែរ បានកើតមានឡើងរយៈពេល ២ខែ មុនពេលលោក Trumpឡើងកាន់អំណាច ។ 

លោក Trump បានសន្យាដំឡើងពន្ធ ៦០ភាគរយលើការនាំចូលទំនិញចិនរបស់សហរដ្ឋអាមេរិក ដែលជាផ្នែកមួយនៃកញ្ចប់វិធានការពាណិជ្ជកម្មអាមេរិកជាធំ ។ ទីក្រុងប៉េកាំង បានច្រានចោលជំហានទាំងនោះ ។

 ប្រធានាធិបតីជាប់ឆ្នោតមកពីគណបក្សសាធារណរដ្ឋរូបនេះ មានគម្រោងផងដែរ ដើម្បីតែងតាំងមនុស្សចូលចិត្តសង្រ្គាមវោហាសាស្រ្តលើចិន សម្រាប់តំណែងជាន់ខ្ពស់ជាច្រើន រួមទាំងសមាជិកព្រឹទ្ធសភាសហរដ្ឋអាមេរិកលោក Marco Rubio ជារដ្ឋមន្រ្តីការបរទេស និងតំណាងរាស្រ្ត Mike Waltz ជាទីប្រឹក្សាសន្តិសុខជាតិ ៕