ហ្វីលីពីនកំពុងត្រៀមទប់ទល់ព្យុះដ៏ធំមួយទៀត ខណៈព្យុះទីហ្វុង Man-yi ចាប់ផ្តើមបោកបក់លើ ប្រទេសប្រជុំកោះនេះក្នុងល្បឿនខ្យល់អតិបរមាប្រហែល ១៩៥ គីឡូម៉ែត្រក្នុងមួយម៉ោង ហើយថែមទាំងមានកម្លាំងខ្យល់បក់បោកកាន់តែលឿនទៀតផង។

ទីភ្នាក់ងារឧតុនិយម PAGASA របស់ប្រទេសនេះបាននិយាយកាលពីថ្ងៃសៅរ៍ថា ព្យុះទីហ្វុងនេះបានបោកបក់លើទីក្រុង Panganiban នៅលើកោះភាគខាងកើតនៃខេត្ត Catanduanes នៅម៉ោងប្រហែល ៩:៤០នាទី យប់ម៉ោងក្នុងស្រុក ។  

មន្ត្រីគ្រោះមហន្តរាយបាននិយាយនៅក្នុងបទសម្ភាសន៍តាមវិទ្យុកាលពីថ្ងៃសៅរ៍ថា មនុស្សជាងកន្លះលាននាក់បានចាកចេញពីផ្ទះរបស់ពួកគេមុនការមកដល់របស់ព្យុះ Man-yi នេះ ខណៈក្រុមអ្នកព្យាករណ៍អាកាសធាតុរបស់រដ្ឋបានព្រមានអំពីផលប៉ះពាល់ធ្ងន់ធ្ងរពីខ្យល់ និងការគំរាមកំហែងដល់អាយុជីវិត។   

ព្យុះទីហ្វុង Man-yi ឬ Pepito គឺជាព្យុះដ៏ធំទី៦ដែលបានវាយប្រហារប្រទេសហ្វីលីពីន។ ព្យុះចំនួនបួនបានបក់បោកនៅមហាសមុទ្រប៉ាស៊ីហ្វិកភាគខាងលិចក្នុងពេលដំណាលគ្នាក្នុងខែនេះ។ 

ទីភ្នាក់ងារឧតុនិយមជប៉ុន បាននិយាយថា នេះជាលើកទីមួយហើយ ដែលព្យុះនេះបានកើតឡើងនៅក្នុងខែវិច្ឆិកា នៅខាងក្រៅរដូវព្យុះស៊ីក្លូនខ្ពស់បំផុតនៅចន្លោះខែកក្កដា និងខែតុលា ចាប់តាំងពីកំណត់ត្រាបានចាប់ផ្តើមកាលពីឆ្នាំ ១៩៥១ ៕