រដ្ឋាភិបាលឥណ្ឌា បាននិយាយកាលពីថ្ងៃអាទិត្យ (១៧ វិច្ឆិកា) ថា ខ្លួននឹងបង្កើនការរឹតបន្តឹងបន្ថែមទៀត រួមទាំងសកម្មភាពសាងសង់ និងការចេញចូលរបស់យានយន្តក្នុងទីក្រុងញូវដេលី និងតំបន់ជុំវិញពីថ្ងៃចន្ទ (១៨ វិច្ឆិកា) នេះដើម្បីប្រយុទ្ធប្រឆាំងនឹងកង្វក់ខ្យល់ ឬការបំពុលបរិយាកាស ដែលកាន់តែអាក្រក់ទៅៗ។

វិធានការថ្មី ដែលមានប្រសិទ្ធភាពចាប់ពីព្រឹកថ្ងៃចន្ទនេះ រួមមានការហាមប្រាមលើរថយន្តដឹកប្រេងម៉ាស៊ូតនៅទីក្រុងដេលី បិទស្ថាប័នអប់រំ និងផ្លាស់ប្តូរទៅធ្វើការពីចម្ងាយ ដូចដែលបានណែនាំដោយរដ្ឋបាលក្នុងតំបន់។

អាជ្ញាធរមូលដ្ឋានក៏បានប្រកាសពីផែនការបាញ់ទឹកជាមួយនឹងថ្នាំកម្ចាត់ធូលីនៅតាមដងផ្លូវ និងដាក់ពង្រាយយានបោសសម្អាតដើម្បីកាត់បន្ថយធូលីផងដែរ។

គុណភាពខ្យល់នៅភាគខាងជើងប្រទេសឥណ្ឌាកាន់តែអាក្រក់ក្នុងសប្តាហ៍មុន ដោយសេចក្តីថ្លែងការណ៍របស់រដ្ឋាភិបាលបាននិយាយថា សន្ទស្សន៍គុណភាពខ្យល់ AQI របស់ទីក្រុងញូវដែលី បានកត់ត្រាតួលេខ ៤៦៥ ដែលត្រូវបានចាត់ថ្នាក់ជា "ប្រភេទធ្ងន់ធ្ងរខ្លាំង" នៅល្ងាចថ្ងៃអាទិត្យ ដោយសារលក្ខខណ្ឌឧតុនិយមមិនអំណោយផល៕