ប្រទេសបង់ក្លាដែស កំពុងប្រយុទ្ធប្រឆាំងនឹងការផ្ទុះឡើងនៃជំងឺគ្រុនឈាមដ៏អាក្រក់បំផុតរបស់ខ្លួនក្នុងរយៈពេលប៉ុន្មានឆ្នាំមកនេះ ដោយមានអ្នកស្លាប់ជាង ៤០០នាក់ មកពីការកើនឡើងនៃសីតុណ្ហភាព និងរដូវមូសុងដ៏យូរជំរុញឱ្យមានកំណើនករណីឆ្លង ដែលបណ្តាលឱ្យមន្ទីរពេទ្យពិបាកក្នុងការដោះស្រាយ ជាពិសេសនៅតាមតំបន់ទីក្រុង។

តួលេខផ្លូវការចុងក្រោយបង្ហាញថា យ៉ាងហោចណាស់មនុស្ស ៤០៧នាក់ បានស្លាប់ដោយសារផលវិបាកដែលពាក់ព័ន្ធនឹងជំងឺនេះក្នុងឆ្នាំ២០២៤ ជាមួយនឹងអ្នកជំងឺ ៧៨.៥៩៥នាក់ ត្រូវបានបញ្ជូនទៅមន្ទីរពេទ្យទូទាំងប្រទេស។ គិតត្រឹមពាក់កណ្តាលខែវិច្ឆិកា អ្នកជំងឺចំនួន ៤.១៧៣នាក់ កំពុងត្រូវបានព្យាបាល ដោយក្នុងនោះមាន ១.៨៣៥នាក់ នៅរដ្ឋធានីដាកា និង ២.៣៣៨នាក់ នៅកន្លែងផ្សេងទៀត។

ចំនួនប្រជាជនដ៏ច្រើននៅក្នុងតំបន់ទីក្រុង ធ្វើឱ្យការរីករាលដាលនៃជំងឺនេះកាន់តែធ្ងន់ធ្ងរ ដែលជាធម្មតាកើតមានជាញឹកញាប់នៅក្នុងរដូវខ្យល់មូសុង ចាប់ពីខែមិថុនា ដល់ខែកញ្ញា ខណៈការផ្ទុះឡើងបានបន្តហួសរដូវកាលនៅឆ្នាំនេះ។

ការកើនឡើងនៃសីតុណ្ហភាព និងខ្យល់មូសុងរយៈពេលយូរ ដែលផ្សារភ្ជាប់ទៅនឹងបម្រែបម្រួលអាកាសធាតុ បានបណ្តាលឱ្យមូសខ្លាបង្កកំណើតកាន់តែច្រើន ដែលជំរុញឱ្យរីករាលដាលយ៉ាងឆាប់រហ័សនៃមេរោគ។ ជំងឺគ្រុនឈាម ជារឿយៗអាចបង្ហាញតែរោគសញ្ញាដំបូងកម្រិតស្រាលប៉ុណ្ណោះ ដែលពិបាកពិនិត្យឃើញ រហូតទាល់តែអ្នកជំងឺមានសភាពធ្ងន់ធ្ងរ៕