ប្រតិបត្តិករបណ្តាញអគ្គិសនីជាតិ បាននិយាយថា តំបន់ទាំងអស់របស់អ៊ុយក្រែននឹងជួបប្រទះការរឹតត្បិតបណ្តោះអាសន្នលើថាមពលអគ្គិសនីនៅថ្ងៃច័ន្ទ ទី១៨ ខែវិច្ឆិកានេះ បន្ទាប់ពីការវាយប្រហារតាមអាកាសដ៏ខ្លាំងរបស់រុស្ស៊ីលើប្រព័ន្ធថាមពលអគ្គិសនី។ រុស្ស៊ី បានធ្វើការវាយប្រហារតាមអាកាសខ្លាំងបំផុតរបស់ខ្លួនលើអ៊ុយក្រែនកាលពីថ្ងៃអាទិត្យ ដោយបានធ្វើឱ្យមានការរំខានដល់ប្រព័ន្ធថាមពលដែលបានខូចខាតស្រាប់ទៅហើយ។

រដ្ឋអាជ្ញាក្នុងតំបន់ បាននិយាយថា មនុស្សយ៉ាងហោចណាស់៨នាក់ រួមទាំងកុមារ ត្រូវបានសម្លាប់នៅក្នុងការវាយប្រហារ នៅពេលដែលមីស៊ីលរបស់រុស្ស៊ីបានធ្លាក់ទៅលើអគារលំនៅឋានមួយកន្លែង ក្នុងតំបន់ Sumy ភាគឦសានប្រទេសអ៊ុយក្រែន។

រដ្ឋអាជ្ញា បាននិយាយនៅក្នុងសេចក្តីថ្លែងការណ៍មួយថា ការវាយប្រហាររបស់សត្រូវ ត្រូវបានគេរាយការណ៍ថា បានម្លាប់មនុស្ស៨នាក់ ក្នុងនោះមានកុមារម្នាក់ ហើយអ្នកស្រុក១០នាក់ផ្សេងទៀតបានរងរបួស។ នៅក្នុងសេចក្តីថ្លែងការណ៍ ប្រតិបត្តិករបណ្តាញអគ្គិសនីជាតិ Ukrenergo បាននិយាយថា ការកាត់ផ្តាច់អគ្គិសនីបណ្តោះអាសន្ននឹងមានរយៈពេលពីម៉ោង៦ព្រឹក រហូតដល់ម៉ោង១០យប់ ហើយបុគ្គលិកកំពុងជួសជុលការខូចខាតឱ្យបានលឿនបំផុតតាមដែលអាចធ្វើទៅបាន។

ប្រធានាធិបតី លោក Volodymyr Zelenskyy បាននិយាយថា ការទម្លាក់គ្រាប់បែកពីលើអាកាសរបស់រុស្ស៊ី បានបំផ្លាញពាក់កណ្តាលនៃសមត្ថភាពផលិតថាមពលរបស់ប្រទេសអ៊ុយក្រែន។ លោក Zelenskyy បាននិយាយថា ទីក្រុងមូស្គូ បានបាញ់មីស៊ីលចំនួន ១២០ គ្រាប់ និងយានដ្រូនចំនួន៩០គ្រឿងទៅកាន់ប្រទេសអ៊ុយក្រែន ប៉ុន្តែទាំងមីស៊ីល និងយានដ្រូនភាគច្រើនត្រូវបានបាញ់ទម្លាក់ដោយប្រព័ន្ធការការពារដែនអាកាសរបស់ទីក្រុងគីវ។