អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យសមាជិក ប្រទេសG20 ប្រើប្រាស់ឥទ្ធិពលរបស់ខ្លួន ដើម្បីដោះស្រាយបញ្ហាសកលសំខាន់ៗ ដូចជាអាកាសធាតុ និងសន្តិភាព។

ក្នុងអំឡុងពេលសន្និសីទសារព័ត៌មាន នៅទីក្រុង Rio de Janeiro ប្រទេសប្រស៊ីល កាលពីថ្ងៃអាទិត្យ ទី១៧ ខែវិច្ឆិកា លោក Guterres បាននិយាយទៅកាន់អ្នកសារព័ត៌មានថា ឆ្នាំ២០២៤នេះគឺល្អប្រសើរសម្រាប់ការរកវិធីដើម្បីដោះស្រាយបញ្ហាកម្តៅ ប៉ុន្មានថ្ងៃបន្ទាប់ពីការចាកចេញពីកិច្ចប្រជុំកំពូល COP29 នៅទីក្រុងបាគូ ប្រទេសអាស៊ែបៃហ្សង់។ ជាមួយគ្នានេះ លោក បានបញ្ជាក់ពីតម្រូវការសន្តិភាពនៅតំបន់ហ្កាហ្សា អ៊ុយក្រែន និងប្រទេសស៊ូដង់ ផងដែរ។

បណ្តាប្រទេសG20 មានចំនួន៨៥%នៃសេដ្ឋកិច្ចពិភពលោក និងជាអ្នករួមចំណែកធំបំផុតដល់ធនាគារអភិវឌ្ឍន៍ពហុភាគី ដែលជួយដល់ផ្នែកហិរញ្ញវត្ថុអាកាសធាតុ។ ប្រទេសទាំងនេះ ក៏ទទួលខុសត្រូវចំពោះការបំភាយឧស្ម័នផ្ទះកញ្ចក់ច្រើនជាងបីភាគបួន នៅទូទាំងពិភពលោក។

ការឈានដល់កិច្ចព្រមព្រៀង អាចកាន់តែមានភាពតឹងតែងដោយការវិលត្រឡប់ទៅកាន់តំណែងរបស់ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ដែលតាមការរាយការណ៍ ថាកំពុងត្រៀមផែនការដើម្បីដកសហរដ្ឋអាមេរិកជាថ្មីម្តងទៀតចេញពីកិច្ចព្រមព្រៀងអាកាសធាតុក្រុងប៉ារីស។ លោក Trump ក៏គ្រោងនឹងលុបចោលច្បាប់ស្តីពីអាកាសធាតុដ៏សំខាន់ ដែលត្រូវបានអនុម័តដោយប្រធានាធិបតីជិតផុតអាណត្តិ លោក Joe Biden។