មហាសេដ្ឋីគាំទ្រលទ្ធិប្រជាធិបតេយ្យទីក្រុងហុងកុង លោក Jimmy Lai គ្រោងនឹងផ្តល់សក្ខីកម្មនៅក្នុងតុលាការ នៅពេលការជម្រះក្តីផ្នែកសន្តិសុខជាតិកម្រិតខ្ពស់ បន្តនៅថ្ងៃពុធ ទី២០ វិច្ឆិកា។

លោក Lai ប្រឈមមុខនឹងការសមគំនិតចំនួនពីរករណី ក្នុងការឃុបឃិតជាមួយកងកម្លាំងបរទេស រួមទាំងការអំពាវនាវឱ្យមានការដាក់ទណ្ឌកម្មប្រឆាំងមន្ត្រីក្រុងហុងកុង និងមន្ត្រីចិន ក្រោមច្បាប់សន្តិសុខជាតិដែលដាក់ដោយប្រទេសចិន។

លោក Lai អាយុ៧៦ឆ្នាំ ជាស្ថាបនិកកាសែត Apple Daily គាំទ្រលទ្ធិប្រជាធិបតេយ្យដែលត្រូវបានបិទនាពេលបច្ចុប្បន្ននេះ ក៏ត្រូវបានចោទប្រកាន់ពីបទសមគំនិត ក្នុងការបោះពុម្ពផ្សាយព័ត៌មានបះបោ ក្រោមច្បាប់បះបោរក្នុងសម័យអាណានិគម។

ទាំងសហរដ្ឋអាមេរិក និងអង់គ្លេស បានអំពាវនាវឱ្យមានការដោះលែងលោក Lai ជាបន្ទាន់ ដោយអះអាងថា ការកាត់ទោសនេះគឺជាហេតុផលនយោបាយ។ ទោះជាយ៉ាងណា អាជ្ញាធរក្រុងហុងកុងជំទាស់ការអះអាងនានាដែលថា មហាសេដ្ឋីរូបនេះ នឹងពុំទទួលបានការកាត់ទោសសសដោយយុត្តិធម៌ ដោយបញ្ជាក់ថាបុគ្គលទាំងអស់មានសិទ្ធស្មើគ្នាចំពោះមុខច្បាប់ ហើយច្បាប់សន្តិសុខជាតិ បាននាំមកនូវស្ថេរភាពដល់ក្រុងហុងកុង ក្រោយការតវ៉ាទ្រង់ទ្រាយធំក្នុងឆ្នាំ២០១៩ ។

ជាមួយគ្នានេះ ក្រុមអ្នករិះគន់បាននិយាយថា តុលាការក្រុងហុងកុងនៅសប្តាហ៍នេះ នឹងកាត់ទោសអ្នកធ្វើយុទ្ធនាការលទ្ធិប្រជាធិបតេយ្យចំនួន៤៥នាក់នៅក្នុងការកាត់ទោសសន្តិសុខជាតិដ៏សំខាន់ដោយមានស្ថានជាប់ពន្ធនាគារធ្ងន់ធ្ងរ ដែលទំនងជានឹងធ្វើឱ្យប៉ះពាល់បន្ថែមទៀតដល់ចលនាគាំទ្រលទ្ធិប្រជាធិបតេយ្យដ៏រស់រវើករបស់មជ្ឈមណ្ឌលហិរញ្ញវត្ថុមួយនេះ។

នៅក្នុងខែឧសភា អ្នកប្រជាធិបតេយ្យ១៤នាក់ក្នុងចំណោម៤៧នាក់ ត្រូវបានរកឃើញថាមានពិរុទ្ធពីបទសមគំនិតក្នុងការធ្វើវិទ្ធង្សនា ហើយពីរនាក់ត្រូវបានរួចទោស ខណៈ៣១នាក់ បានសារភាពថាមានទោស ដោយសង្ឃឹមថានឹងមានការបន្ថយទោស។