យោងតាមការស្ទង់មតិរបស់សារព័ត៌មាន ខ្យូដូ ញូវស៍ (Kyodo News) ដែលបានធ្វើឡើងកាលពីចុងសប្តាហ៍បង្ហាញថា អត្រាគាំទ្រសម្រាប់គណៈរដ្ឋមន្ត្រីរបស់នាយករដ្ឋមន្ត្រីជប៉ុន លោក Shigeru Ishiba បានកើនឡើង ៧,៩ពិន្ទុ ដល់តួលេខ ៤០%។

ខណៈការស្ទង់មតិបង្ហាញពីភាពប្រសើរឡើង តួលេខនេះនៅតែទាបជាងការគាំទ្រលើស ៥០% ដែលបានមើលឃើញភ្លាមៗ បន្ទាប់ពីលោកចូលកាន់តំណែងនៅថ្ងៃទី០១ ខែតុលា។

ការស្ទង់មតិដែលធ្វើឡើងតាមរយៈទូរសព្ទនេះបានបង្ហាញថា ចំនួនអ្នកឆ្លើយតប ៦៩,៩% បានគាំទ្រការកែសម្រួលកម្រិតប្រាក់ចំណូលសម្រាប់ការយកពន្ធ ខណៈមនុស្ស ៣២,៤% និយាយថាទំនាក់ទំនងជប៉ុន-អាមេរិក នឹងកាន់តែយ៉ាប់យ៉ឺន បន្ទាប់ពីប្រធានាធិបតីជាប់ឆ្នោតរបស់អាមេរិក លោក Donald Trump ចូលកាន់តំណែង។

បន្ទាប់ពីការបោះឆ្នោតសកលកាលពីថ្ងៃទី២៧ ខែតុលា ដែលគណបក្សកាន់អំណាច ប្រជាធិបតេយ្យសេរី (LDP) របស់នាយករដ្ឋមន្ត្រីរូបនេះ រងការខាតបង់យ៉ាងសំខាន់ ពេលនេះលោក Ishiba បានដឹកនាំរដ្ឋាភិបាលក្នុងសំឡេងភាគតិច។

លទ្ធផលស្ទង់មតិក៏បានបង្ហាញផងដែរថា មនុស្ស ៦៧,៩% បានគាំទ្រកិច្ចសហប្រតិបត្តិការរវាងក្រុមចម្រុះដែលកំពុងកាន់អំណាច និងបក្សប្រឆាំង ដើម្បីអនុម័តសេចក្ដីស្នើច្បាប់ដោយរលូន៕