ប្រទេសនីហ្សេរីយ៉ា និងឥណ្ឌា បានព្រមព្រៀងគ្នាដើម្បីកសាងភាពជាដៃគូយុទ្ធសាស្ត្រដ៏រឹងមាំ ដោយសន្យាពង្រឹងទំនាក់ទំនងក្នុងវិស័យសំខាន់ៗរួមមានការអភិវឌ្ឍន៍សេដ្ឋកិច្ច ការពារជាតិ ការថែទាំសុខភាព និងសន្តិសុខស្បៀង។

ក្នុងអំឡុងជំនួបនៅទីក្រុង Abuja រដ្ឋធានីប្រទេសនីហ្សេរីយ៉ា ប្រធានាធិបតីនីហ្សេរីយ៉ា លោក Bola Tinubu និងនាយករដ្ឋមន្ត្រីឥណ្ឌា លោក Narendra Modi ដែលបានទៅធ្វើទស្សនកិច្ចផ្លូវរដ្ឋរយៈពេលពីរថ្ងៃនៅប្រទេសអាហ្វ្រិកខាងលិចមួយនេះ បានព្រមព្រៀងចំពោះកិច្ចសហការកាន់តែរឹងមាំក្នុងការប្រឆាំងភេរវកម្ម សន្តិសុខដែនសមុទ្រ និងការចែករំលែកព័ត៌មានសម្ងាត់។

ដោយមានការគំរាមកំហែងកាន់តែខ្លាំងឡើងនៅឈូងសមុទ្រហ្គីណេ និងមហាសមុទ្រឥណ្ឌា មេដឹកនាំទាំងពីរ បានព្រមព្រៀងសម្របសម្រួលសកម្មភាពនានាដើម្បីការពារផ្លូវពាណិជ្ជកម្មដែនសមុទ្រ និងការប្រយុទ្ធប្រឆាំងចោរសមុទ្រ ដោយប្តេជ្ញាបន្តសមយុទ្ធកងទ័ពជើងទឹកជាប្រចាំ និងប្រតិបត្តិការប្រឆាំងចោរកម្មសមុទ្ររួមគ្នានៅឈូងសមុទ្រហ្គីណេ។

សេចក្តីថ្លែងការណ៍រួម ដែលបានចេញនៅចុងបញ្ចប់នៃដំណើរទស្សនកិច្ចផ្លូវរដ្ឋរបស់ លោក Modi បាននិយាយថា «មេដឹកនាំទាំងពីរ បានបញ្ជាក់ជាថ្មីពីការថ្កោលទោសដាច់ខាតចំពោះអំពើភេរវកម្មក្នុងគ្រប់រូបភាព រួមមានទាំងការធ្វើដំណើរឆ្លងព្រំដែនរបស់ក្រុមភេរវករ និងបណ្តាញផ្តល់ហិរញ្ញវត្ថុភេរវកម្ម និងផ្តល់ទីជម្រកសុវត្ថិភាព ដល់ក្រុមនេះ។