សហរដ្ឋអាមេរិក បានប្រកាសកាលពីថ្ងៃអង្គារសប្តាហ៍មុនថា សហរដ្ឋអាមេរិក បានប្រកាសផ្តល់មូលនិធិយោធាចំនួន ៥០០លានដុល្លារ ដើម្បីធ្វើទំនើបកម្មកងកម្លាំងប្រដាប់អាវុធហ្វីលីពីន ខណៈដែលសម្ព័ន្ធមិត្តបានព្រមព្រៀងគ្នា ក្នុងការពង្រឹងកិច្ចសហប្រតិបត្តិការការពារជាតិ ចំពេលមានភាពតានតឹងជាមួយទីក្រុងប៉េកាំង នៅក្នុងសមុទ្រចិនខាងត្បូងដែលមានជម្លោះ។

ការផ្តល់ជំនួយនេះ ត្រូវបានប្រកាស បន្ទាប់ពីរដ្ឋមន្ត្រីការបរទេសអាមេរិកលោក Antony Blinken និងរដ្ឋ  មន្ត្រីការពារជាតិ Lloyd Austin បានជួបប្រជុំគ្នា ជាមួយសមភាគីហ្វីលីពីនគឺរដ្ឋមន្ត្រីការបរទេស Enrique Manalo និងរដ្ឋមន្ត្រីការពារជាតិ Gilberto Teodoro Jr នៅទីក្រុងម៉ានីល។ 

លោក Blinken បានថ្លែងប្រាប់អ្នកយកព័ត៌មានថា៖«ឥឡូវនេះ យើងកំពុងផ្តល់ថវិកាបន្ថែមចំនួន ៥០០លានដុល្លារ ជាជំនួយយោធាបរទេសដល់ហ្វីលីពីន ដើម្បីបង្កើនកិច្ចសហប្រតិបត្តិការផ្នែកសន្តិសុខជាមួយសម្ព័ន្ធមិត្តសន្ធិសញ្ញាដ៏យូរបំផុតរបស់យើង នៅក្នុងតំបន់នេះ ជាជំហានថ្មីមួយ ក្នុងការពង្រឹងសម្ព័ន្ធភាព ដែលជាការវិនិយោគពីមួយជំនាន់ទៅមួយជំនាន់ ដើម្បីជួយធ្វើទំនើបកម្មកងកម្លាំងប្រដាប់អាវុធហ្វីលីពីន និងឆ្មាំល្បាតឆ្នេរសមុទ្រ»។  

ការប្ដេជ្ញាចិត្តរបស់អាមេរិក ក្នុងការជំរុញជំនួយការពារជាតិរបស់ខ្លួនសម្រាប់ហ្វីលីពីន កើតឡើង បន្ទាប់ពីមានការប្រឈមមុខដាក់គ្នាលើដែនសមុទ្ររវាងនាវាឆ្មាំសមុទ្រចិន និងនាវាហ្វីលីពីន នៅក្នុងដែនទឹកយុទ្ធសាស្ត្រ ដែលទីក្រុងប៉េកាំងអះអាងថា ជារបស់ខ្លួន។