អាមេរិក៖ សហរដ្ឋអាមេរិក អង់គ្លេស និងបារាំងបានបញ្ជាក់កាលពីថ្ងៃពុធ ទី២០ ខែតុលាដល់អង្គការសហប្រជាជាតិថា ប្រទេសកូរ៉េខាងជើងបានធ្វើឱ្យមានការរីកចម្រើននៅក្នុងកម្មវិធីអាវុធរបស់ខ្លួន បន្ទាប់ពីការបាញ់មីស៊ីលបាលីស្ទីកចេញពីនាវាមុជទឹក។ ថ្លែងទៅកាន់ប្រព័ន្ធផ្សព្វផ្សាយ មុនកិច្ចប្រជុំក្រុមប្រឹក្សាសន្តិសុខបិទទ្វារដែលត្រូវបានកោះប្រជុំបន្ទាន់ដោយទីក្រុងវ៉ាស៊ីនតោន និងទីក្រុងឡុងដ៍ ឯកអគ្គរដ្ឋទូតនៃបណ្តារដ្ឋលោកខាងលិចទាំងអស់ បានថ្កោលទោសចំពោះការបាញ់កាលពីមួយថ្ងៃមុនថាជា “សកម្មភាពការបង្កហេតុ” ថ្មីមួយ។
ដោយមិននិយាយពីការដាក់ទណ្ឌកម្មថ្មីដែលអាចធ្វើទៅបាន ឬសកម្មភាពរួមគ្នាដោយក្រុមប្រឹក្សានេះ ក្រុមឯកអគ្គរដ្ឋទូតទាំងនោះបាននិយាយថា ខ្លួននឹងអំពាវនាវឱ្យមានការដាក់ទណ្ឌកម្មអន្តរជាតិដែលមានស្រាប់ ដើម្បីឱ្យកាន់តែមានប្រសិទ្ធភាពជាងមុន។ នៅចុងបញ្ចប់នៃកិច្ចប្រជុំទាំងចិនទាំងរុស្ស៊ីដែលជាសមាជិកអចិន្ត្រៃយ៍ ២ផ្សេងទៀតនៃក្រុមប្រឹក្សាសន្តិសុខពុំបានបញ្ចេញយោបល់អ្វីទេ។ យោងតាមក្រុមអ្នកការទូតដែលនិយាយសុំមិនបញ្ចេញឈ្មោះថា គ្មានសមាជិកក្រុមប្រឹក្សាសន្តិសុខណាម្នាក់ បានស្នើឲ្យមានសេចក្តីថ្លែងការណ៍រួមពីស្ថាប័ននេះទេ។ ប្រព័ន្ធផ្សព្វផ្សាយរដ្ឋកូរ៉េខាងជើងបានរាយការណ៍នៅថ្ងៃព្រហស្បតិ៍ ទី២១ ខែតុលានេះថា កូរ៉េខាងជើងបានចោទប្រកាន់សហរដ្ឋអាមេរិកពីបទប្រើប្រាស់ស្តង់ដារ២ ជុំវិញការសាកល្បងអាវុធ បន្ទាប់ពីកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិ ស្តីពីបញ្ហានេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
