លោក Donald Trump បានផ្តល់ហេតុផលមួយចំនួន ដែលនាំឲ្យកោះតៃវ៉ាន់កើតក្ដីបារម្ភបាន។ ជាក់ស្ដែង អំឡុងពេលធ្វើយុទ្ធនាការបោះឆ្នោត លោកប្រធានាធិបតីជាប់ឆ្នោតរូបនេះ បានជំរុញឲ្យកោះតៃវ៉ាន់ចំណាយប្រាក់បន្ថែមទៀត ដើម្បីទទួលបានការពារប្រឆាំងនឹងការគំរាមកំហែងពីការវាយប្រហារដោយប្រទេសចិន។

ជាមួយគ្នានេះ លោក Trump បានចោទក្រុមហ៊ុនផលិតបន្ទះឈីបរបស់កោះតៃវ៉ាន់ ជាឧស្សាហកម្មទ្រទ្រង់សំខាន់ដែលមានចំនួន ១៥ភាគរយនៃផលិតផលក្នុងស្រុកសរុប (GDP) ថា បានលួចយកការងាររបស់សហរដ្ឋអាមេរិក។ មិនត្រឹមតែប៉ុណ្ណោះ លោកបានដាក់បញ្ចូលមហាសេដ្ឋីមួយរូបចូលទៅក្នុងក្រុមរបស់លោក គឺលោក Elon Musk ដែលបានសើចចំអកដល់ការប្តេជ្ញាចិត្តរបស់កោះតៃវ៉ាន់ ក្នុងការបន្តរក្សាស្វ័យភាពរបស់ខ្លួន។ ហើយលោកបានលើកឡើងថា កេរ្តិ៍ឈ្មោះរបស់លោក គឺគ្រប់គ្រាន់ ក្នុងការរារាំងមេដឹកនាំចិន លោក Xi Jinping (ស៊ី ជីនពីង) កុំឲ្យលុកលុយកោះនេះ។

តែក្នុងពេលជាមួយគ្នានោះ ទីក្រុងប៉េកាំងបានចាប់ផ្តើមសមយុទ្ធយោធា ដែលបង្កើតបានជាសំណួរ សម្រាប់កោះនេះថា តើលោក Trump នឹងធ្វើអ្វី ប្រសិនបើចិនព្យាយាមលុកលុយកោះតៃវ៉ាន់?

អ្នកខ្លះ នៅកោះតៃវ៉ាន់ និយាយថា ការរស់រានមានជីវិត ក្នុងនាមជាកោះកាន់លទ្ធិប្រជាធិបតេយ្យស្វ័យគ្រប់គ្រង គឺស្ថិតក្នុងហានិភ័យ ប្រសិនបើខ្លួនមិនអាចមានលទ្ធភាពចំណាយតាមអ្វីដែលលោក Trump ទាមទារលើវិស័យការពារជាតិទេនោះ ហើយថា កោះនេះនឹងចុះខ្សោយ នៅក្នុងសង្គ្រាមពាណិជ្ជកម្ម រវាងសហរដ្ឋអាមេរិក និងចិន។ គួរបញ្ជាក់ថា ទីក្រុងប៉េកាំងបានអះអាងថា កោះនេះជាកម្មសិទ្ធិរបស់ខ្លួន ហើយមិនបានច្រានចោលការប្រើកម្លាំង ដើម្បីក្រសោបយកកោះនេះនោះឡើយ។

យ៉ាងណាក្ដី អ្នកដឹកនាំរបស់កោះតៃវ៉ាន់ កំពុងសង្កត់ធ្ងន់លើភាពវិជ្ជមាន ដោយបន្ទាប់ពីមានសន្និសីទ ស្ដីពីអ្វីដែលរំពឹងថា នឹងទទួលបានពីសេតវិមាន ក្រោយលោក Trump វិលទៅកាន់អំណាចវិញ មេដឹកនាំលោក Lai Ching-te បាននិយាយកាលពីថ្ងៃពុធកណ្ដាលសប្ដាហ៍កន្លងមកថា៖ «ខ្ញុំមានទំនុកចិត្តថា ភាពជាដៃគូយូរអង្វែង រវាងកោះតៃវ៉ាន់ និងសហរដ្ឋអាមេរិក នឹងនៅតែជាសសរស្តម្ភដ៏សំខាន់នៃស្ថិរភាព នៅក្នុងតំបន់»៕