ប្រធានាធិបតីនៃប្រទេសប៉េរូ បានចុះហត្ថលេខាលើកិច្ចព្រមព្រៀងកិច្ចសហប្រតិបត្តិការលើវិស័យការពារជាតិ និងការរុករករ៉ែជាមួយសមភាគីជប៉ុនរបស់លោក កាលពីថ្ងៃអាទិត្យ (ទី១៧ ខែវិច្ឆិកា) ដោយកិច្ចព្រមព្រៀងនេះកើតមានឡើងក្រោយមានទស្សនកិច្ចជាផ្លូវការ រវាងមេដឹកនាំទាំង២ បន្ទាប់ពីកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកដែលរៀបចំដោយទីក្រុងលីម៉ា។

កិច្ចព្រមព្រៀងនេះត្រូវបានចុះហត្ថលេខាដោយប្រធានាធិបតីប៉េរូ លោកស្រី Dina Boluarte និងនាយករដ្ឋមន្ត្រីជប៉ុន លោក Shigeru Ishiba ដែលនៅក្នុងសុន្ទរកថាបានលើកឡើងពីអ្វីដែលលោកបានពិពណ៌នាថា ជាផែនទីបង្ហាញផ្លូវកិច្ចសហប្រតិបត្តិការរយៈពេល ១០ឆ្នាំ។

ហើយផ្នែកមួយនៃកិច្ចព្រមព្រៀងនេះពាក់ព័ន្ធនឹងជំនួយ ក្នុងការជំរុញខ្សែច្រវាក់ផ្គត់ផ្គង់ការរុករករ៉ែ។ ប៉េរូ គឺជាប្រទេសមួយក្នុងចំណោមប្រទេសផលិតទង់ដែងលំដាប់កំពូលរបស់ពិភពលោក ខណៈជប៉ុន គឺជាប្រទេសប្រើប្រាស់ដ៏សំខាន់នៃលោហៈឧស្សាហកម្មសំខាន់ៗ។

គួបញ្ជាក់ដែរថា កាលពីសប្តាហ៍មុន ដោយមានការចូលរួមពីសំណាក់ប្រធានាធិបតីចិន លោក Xi Jinping (ស៊ី ជីនពីង) ប្រទេសប៉េរូបានបើកសម្ពោធជាផ្លូវការនូវកំពង់ផែដ៏ធំនៅឆ្នេរសមុទ្រប៉ាស៊ីហ្វិកឈ្មោះ Chancay ដែលសាងសង់ដោយចិន ដោយកំពុងធានាបានថា ការធ្វើពាណិជ្ជកម្ម នឹងមានរយៈពេលលឿន និងប្រសិទ្ធភាពជាងមុន រវាងអាមេរិកឡាទីន និងអាស៊ី៕