អតីតឯកអគ្គរដ្ឋទូតសហរដ្ឋអាមេរិកប្រចាំនៅហ្សកហ្ស៊ីលោក Ian Kelly បាននិយាយថា ការសម្រេចចិត្តរបស់ប្រធានាធិបតីសហរដ្ឋអាមេរិកលោក Joe Biden អនុញ្ញាតឲ្យអ៊ុយក្រែនប្រើប្រាស់អាវុធផលិតនៅអាមេរិក វាយប្រហារកាន់តែជ្រៅទៅក្នុងទឹកដីរុស្ស៊ី ទំនងជាមិនផ្លាស់ប្តូរគន្លងទាំងមូលនៃសង្រ្គាមនោះឡើយ ប៉ុន្តែវាអាចជួយអ៊ុយក្រែនពេលដែលរុស្ស៊ីដណ្តើមបានទឹកដី ហើយនិងអាចធ្វើឲ្យអ៊ុយក្រែន ស្ថិតលើទីតាំងចរចាកាន់តែល្អប្រសើរ ពេលដែលកិច្ចប្រជុំស្វែងរកបទឈប់បាញ់កើតឡើង ។

លោក Kelly និយាយថា លោកគិតថា វាគឺជាសញ្ញាមួយបង្ហាញដល់រុស្ស៊ីថា សហរដ្ឋអាមេរិកនឹងមិនដកខ្លួននោះទេ ថាពួកយើងនឹងបន្តគាំទ្រអ៊ុយក្រែន ។

លោកបន្តថា លោកគិតថា មាននូវការរំពឹងមួយថា ពួកយើងនឹងចូលរួមដោះស្រាយបញ្ហាមួយនេះ តាមវិស័យការទូត ហើយបើសិនជាអ្នកនឹងធ្វើបែបនេះ អ្នកនឹងធ្វើឲ្យភាគីរបស់អ្នកស្ថិតនៅទីតាំងខ្លាំងជាងផ្នែកយោធា ឬផ្នែកតាក់ទិក ។

មន្រ្តីសហរដ្ឋអាមេរិក ២រូប និងប្រភពដែលនៅជិតស្និតនឹងការសម្រេចចិត្តនេះ បានប្រកាសឲ្យដឹងពីការផ្លាស់ប្តូរជាដុំកំភួននៃគោលនយោបាយទីក្រុងវ៉ាស៊ីងតោននៅក្នុងជម្លោះរុស្ស៊ី-អ៊ុយក្រែន កាលពីព្រឹកថ្ងៃអាទិត្យ ។

ទោះបីជាមានការសុំទទួចរបស់ប្រធានាធិបតីអ៊ុយក្រែនលោក Volodymyr Zelenskiyយ៉ាងណាក៏ដោយ សេតវិមាននៅតែស្ទាក់ស្ទើរក្នុងការអនុញ្ញាតឲ្យអាវុធផ្គត់ផ្គង់ដោយសហរដ្ឋអាមេរិក ត្រូវបានប្រើប្រាស់ដើម្បីវាយប្រហារគោលដៅជ្រៅៗនៅក្នុងទឹកដីរុស្ស៊ី ដោយសារក្តីបារម្ភថា វានឹងនាំឲ្យជម្លោះកាន់តែរីកធំ ។

ប្រធានាធិបតីរុស្ស៊ីលោក Vladimir Putin បានព្រមានលោកខាងលិចជាយូរមកហើយថា មិនត្រូវអនុញ្ញាតឲ្យអាវុធសហរដ្ឋអាមេរិកប្រើប្រាស់វាយប្រហារកាន់តែជ្រៅទៅក្នុងទឹកដីរុស្ស៊ីនោះឡើយ ប៉ុន្តែលោក Kelly និយាយថា លោកមានជំនឿថា លោក Putin មិនទំនងជាវាយប្រហារសហរដ្ឋអាមេរិកដោយផ្ទាល់នោះទេ ក្នុងលក្ខណៈយោធា ៕