ប្រភព នៅលីបង់ នាថ្ងៃចន្ទ (ទី១៨ ខែវិច្ឆិកា) នេះ បាននិយាយថា មន្ត្រីអាមេរិកដែលទទួលខុសត្រូវលើទំនាក់ទំនង ដើម្បីឲ្យមានបទឈប់បាញ់ រវាងអ៊ីស្រាអែល និងក្រុមហេសបូឡាគាំទ្រដោយអ៊ីរ៉ង់នៅក្នុងប្រទេសលីបង់ គ្រោងទៅបំពេញទស្សនកិច្ច នៅទីក្រុងបេរូត នៅថ្ងៃអង្គារស្អែកនេះ ដោយគេរំពឹងថា នឹងមានការឆ្លើយតបពីទីក្រុងនេះ ចំពោះសំណើបទឈប់បាញ់របស់សហរដ្ឋអាមេរិក។

ការងារការទូត ដើម្បីឲ្យមានបទឈប់បាញ់ដឹកនាំដោយសហរដ្ឋអាមេរិក បានវិលមកស្ថិតក្នុងការចាប់អារម្មណ៍ឡើងវិញ ខណៈដែលអ៊ីស្រាអែល បាន និងកំពុងបង្កើនការវាយលុករបស់ខ្លួន ដែលមានដូចជា ការវាយប្រហាររបស់អ៊ីស្រាអែល ក្នុងសង្កាត់ចំនួន២ នៅទីក្រុងបេរូត បានសម្លាប់មនុស្សចំនួន ៦នាក់ ដោយក្នុងនោះមានរួមទាំងមន្ត្រីជាន់ខ្ពស់យ៉ាងហោចណាស់ម្នាក់របស់ក្រុមហេសបូឡាផងដែរ កាលពីថ្ងៃអាទិត្យ (ទី១៧ ខែវិច្ឆិកា) ជាលើកដំបូងដែលអ៊ីស្រាអែលបានវាយប្រហារតំបន់ភាគកណ្តាលនៃរដ្ឋធានី ក្នុងរយៈពេលមួយខែ។

គួរបញ្ជាក់ថា សំណើបទឈប់បាញ់ថ្មីរបស់សហរដ្ឋអាមេរិក ត្រូវបានប្រគល់កាលពីសប្តាហ៍មុនដល់ប្រធានសភាលីបង់ លោក Nabih Berri ដែលត្រូវបានគាំទ្រដោយក្រុមហេសបូឡា ដើម្បីឲ្យមានកិច្ចចរចា។

ប្រភពនយោបាយលីបង់ បានប្រាប់សារព័ត៌មាន Reuters ថា បេកសជនរបស់សេតវិមាន លោក Amos Hochstein ត្រូវបានរំពឹងថា នឹងមានវត្តមាននៅទីក្រុងបេរូត នាថ្ងៃអង្គារ សម្រាប់កិច្ចពិភាក្សា ស្តីពីបទឈប់បាញ់។ ប្រព័ន្ធផ្សព្វផ្សាយលីបង់ Voice of Lebanon ក៏បានរាយការណ៍អំពីដំណើរទស្សនកិច្ចនេះផងដែរ ដោយដកស្រង់សម្តីសមាជិកសភាលីបង់ លោក Kassem Hashem ដែលជាផ្នែកមួយនៃក្រុមសមាជិកសភារបស់លោក Berri៕