សេវាកម្មសង្រ្គោះបន្ទាន់ និងយោធាអ៊ុយក្រែន និយាយថា មនុស្ស ១១នាក់ រួមទាំងកុមារ ២នាក់ ត្រូវបានសម្លាប់ និងមនុស្ស ៨៩នាក់ផ្សេងទៀត បានរងរបួស កាលពីយប់ថ្ងៃអាទិត្យ ពេលដែលមីស៊ីល ១គ្រាប់របស់រុស្ស៊ី វាយប្រហារលើអគារស្នាក់នៅកម្ពស់ ៩ជាន់នៅតំបន់ភាគឦសាន Sumy ប្រទេសអ៊ុយក្រែន ។

សេវាកម្មសង្រ្គោះបន្ទាន់អ៊ុយក្រែន និយាយនៅលើបណ្តាញព័ត៌មានសង្គម Telegramថា មនុស្ស ៨៩នាក់ រួមទាំងកុមារ ១១នាក់ បានរងរបួសក្នុងការវាយប្រហារនេះ ។

រូបភាពវីដេអូឃ្លីបដែលបានបញ្ចេញនៅថ្ងៃចន្ទ ឃើញរណ្តៅដ៏ធំមួយ រថយន្តរងការបំផ្លិចបំផ្លាច និងអគារបាក់បែក ។

ក្រុមភ្នាក់ងារពន្លត់អគ្គិភ័យ បានព្យាយាមពន្លត់ភ្លើងឆាបឆេះរថយន្ត ហើយក្រមជួយសង្រ្គោះ បាននាំមនុស្សចេញពីអគារ ។ អគាររស់នៅកម្ពស់ច្រើនជាន់នេះដែរ ត្រូវបានគេមើលឃើញបង្អួចផ្ទុះបែកបាក់ និងនៅផ្នែកខាងមុខ បានរងការខូចខាត ។

ការវាយប្រហារលើតំបន់ Sumy បានកើតមានឡើងបន្ទាប់ពីរុស្ស៊ី វាយប្រហារលើបណ្តាញផ្គត់ផ្គង់អគ្គិសនីអ៊ុយក្រែន ដែលទីក្រុងគីវនិយាយថា វាគឺជាការវាយប្រហារទ្រង់ទ្រាយធំ ដោយប្រើប្រាស់មីស៊ីល ១២០គ្រាប់ និងយានដ្រូន ៩០គ្រឿង ហើយនិងបានសម្លាប់មនុស្សយ៉ាងហោច ៧នាក់ ៕