រដ្ឋមន្ត្រីការបរទេសហុងគ្រី លោក Peter Szijjarto បាននិយាយថា អ្នកដែលនៅសហរដ្ឋអាមេរិក និងសហភាពអឺរ៉ុប ដែលគាំទ្រការបន្តជម្លោះ នៅប្រទេសអ៊ុយក្រែន បានត្រៀមខ្លួនរួចជាស្រេច ដើម្បីពង្រីកវា ទៅកម្រិតពិភពលោក។

លោកបានសរសេរនៅលើហ្វេសប៊ុកថា៖«ជាក់ស្តែង នៅក្នុងភាពអស់សង្ឃឹមរបស់ពួកគេ អ្នកគាំទ្រសង្រ្គាមនឹងមិនស្ទាក់ស្ទើរក្នុងការធ្វើរឿងដ៏អាក្រក់បំផុតនោះទេ ពោលគឺពង្រីកសង្រ្គាមនៅអ៊ុយក្រែន ដល់កម្រិតសកល» មុនពេលចាកចេញទៅកាន់ទីក្រុងប្រ៊ុចសែល ដើម្បីចូលរួមក្នុងកិច្ចប្រជុំរដ្ឋមន្ត្រីការបរទេសសហភាពអឺរ៉ុប។

ទោះបីជាយ៉ាងណាក៏ដោយ លោក Szijjarto មិនបាននិយាយត្រង់ថា សហរដ្ឋអាមេរិក ចក្រភពអង់គ្លេស និងបារាំង បានអនុញ្ញាតឲ្យអ៊ុយក្រែនប្រើប្រាស់អាវុធចម្ងាយឆ្ងាយរបស់ពួកគេ ដើម្បីធ្វើការវាយប្រហារ នៅក្នុងប្រទេសរុស្ស៊ីនោះទេ។ ក្រសួងការបរទេសហុងគ្រី មិនទាន់បានឆ្លើយតបទៅនឹងសំណើរបស់សារព៏ត៌មាន TASS ដើម្បីធ្វើអត្ថាធិប្បាយលើការសម្រេចរបស់បណ្តាប្រទេសលោកខាងលិចសំខាន់ៗនោះទេ។

ទន្ទឹមនឹងនេះ លោក Szijjarto បានចង្អុលបង្ហាញថា៖«អ្នកគាំទ្រសង្រ្គាមនៅទីក្រុងវ៉ាស៊ីនតោន និងទីក្រុងប្រ៊ុចសែល បានបើកការវាយប្រហារចុងក្រោយដោយអស់សង្ឃឹមលើការពិតថ្មី»។ ប្រមុខការទូតហុងគ្រីរូបនេះ ជឿជាក់ថា ការពិតថ្មីត្រូវបានបង្កើតឡើងដោយការឈ្នះការបោះឆ្នោតរបស់គណបក្សស្តាំនិយម នៅក្នុងប្រទេសមួយចំនួននៃសហភាពអឺរ៉ុប និងជ័យជម្នះរបស់លោក ដូណាល់ ត្រាំ ក្នុងការបោះឆ្នោតប្រធានាធិបតីសហរដ្ឋអាមេរិក។